फोहोर मैला व्यवस्थापनका लागि बर्दिवास नगरपालिकाले गर्‍यो सम्झौता

काठमाडौँ । बर्दिवास नगरपालिकाले ग्रीन सिफ्ट परियोजनासँग आधिकारिक रूपमा साझेदारी गरेको छ । चक्रीय अर्थतन्त्र प्रवद्र्धन गर्नका लागि युरोपेली संघको सहयोगमा कार्यन्वयन हुन लागेको चार वर्षीय परियोजना हो । यो परियोजनालाई क्रिएशनले सञ्चालन गरिरहेको छ । बर्दिवास नगरपालिकाका उपमेयर तारादेवी महतोले फोहोरमैला व्यवस्थापनका लागि तथ्यांक संकलन, अनुसन्धान र नीति निर्माणमा सहयोगलगायतका विषय रहेको सम्झौतापत्रमा हस्ताक्षर गरेका छन् ।

उपमेयर महतोले यो सम्झौताले प्लास्टिक फोहोर व्यवस्थापन क्षेत्रमा सहयोग पुग्ने विश्वास लिएको बताइन् । यो परियोजना सफल पार्नमा नगरपालिकाको पूर्ण सहयोग रहने बताउँदै उनले यसबाट नगरपालिकावासीले लाभ लिने कुरामा पनि विश्वस्त रहेको बताइन् । बर्दिवास नगरपालिकासहित ग्रिनसिफ्ट नेपाल परियोजनाले बागमती, लुम्बिनी र मधेश प्रदेशका नौ वटा पालिकामा काम गरिरहेको छ । ग्रीनसिफ्ट नेपालले फोहोर सङ्कलन गर्ने उद्योग, साना तथा मझौला उद्योग, सफाइकर्मीहरुको संस्था, युवाहरू, विद्यालयका बालबालिकाहरू रसरकार मिलेर काम गरिरहेको छ ।

यो परियोजनाले सन् २०३० सम्ममा १०० नगरपालिकामा फोहोर छुट्याउने र फोहोरबाट ऊर्जा बनाउन पहल गर्ने प्रतिबद्धता पनि जनाएको छ । विगत केही दशकहरूमा प्लास्टिकको खपत उल्लेखनीय रूपमा बढेको छ ।  जसले प्लास्टिक फोहोर व्यवस्थापनका लागि महत्वपूर्ण चुनौतीहरू सिर्जना गरेको छ । नेपालभरका ल्यान्डफिलहरूमा दैनिक करिब ६०० टन प्लाष्टिक फोहोर फालिन्छ । परियोजनाका अनुसार नेपालमा प्लास्टिक चुहावट प्रतिवर्ष करिब २० हजार ६०० टन हुने अनुमान गरेको छ । यी प्लास्टिकहरू समयको साथ वातावरणमा सञ्चित भएर म्याक्रो र माइक्रो प्लास्टिकमा परिवर्तन हुन्छन् जसले वातावरणमा नकारात्मक प्रभाव पार्छ ।

Facebook Comments Box
TOP
156 Shares