अमेरिका र दक्षिण कोरियाको संयुक्त सैन्य अभ्यासलगत्तै उत्तर कोरियाले हान्यो ब्यालिष्टिक मिसाइल

प्योङयाङ । सोमबार मध्यान्ह उत्तर कोरियाले एल्लो सी तर्फ अनेकौँ ब्यालिष्टिक मिसाइल प्रहार गरेको छ । दक्षिण कोरियाली सेनालाई उद्धृत गर्दै सो सम्बन्धी समाचार अन्तर्राष्ट्रिय सञ्चारमाध्यमहरूले छापेका छन् ।

अमेरिका र दक्षिण कोरियाले व्यापक स्तरमा संयुक्त सैन्य अभ्यास सुरु गरेको केही घन्टापछि उत्तर कोरियाले पहिचान खुल्न बाँकी रहेका ती मिसाइल हानेको बताइएको छ । मिसाइल उत्तर कोरियाको ह्वाङगहेए प्रान्तबाट दिउँसो मध्यान्ह १ः५० बजे आसपास प्रहार भएको भनिएको छ ।

आफ्नो सेनाले सतर्कता र निगरानी बढाएको दक्षिण कोरियाको ज्वाइन चफ्सि अफ स्टाफ (जेसीएस)ले भनेको छ । मिसाइलको प्रकार, यसको रेञ्ज लगायत जानकारी पछि सार्वजनिक गरिने जेसीएसले भनेको छ ।

एक दिनअघि मात्रै उत्तर कोरियाको पार्टीको मुखपत्रले अमेरिका र दक्षिण कोरियाबिचको सैन्य अभ्यासलाई आक्रामक र टकराबपूर्ण युद्ध अभ्यास भनेर भनेको थियो ।

गत हप्ता मात्रै उत्तर कोरियाली नेता किम जोङ उनकी बहिनीले कोरियाली प्रायद्वीपमा अमेरिकी सैन्य गतिविधिको प्रतिक्रियामा उत्तर कोरियाले रणनीतिक स्तरको कदम चर्काउनेबारे सोचिरहेको बताएकी थिइन् ।

Facebook Comments Box