महिलाहरुले मात्रै ताने रातो मच्छिन्द्रनाथको रथ

काठमाण्डौ – ललितपुरको रातो मच्छिन्द्रनाथको रथयात्राको क्रममा आज बिहानै महिलाले मात्र रथ तानेर लगनखेलको थति चोकमा पुर्‍एका छन् ।

रथयात्राको क्रममा हरेक वर्ष नरिवल खसाल्ने जात्राको भोलिपल्ट बिहान महिलाले मात्र रथ तान्नुपर्ने परम्परा याक मिसाया भुज्या अनुसार आज बिहान महिलाले तानेर थति चोकमा पुर्‍याएका हुन् ।

हिजो रथको टुप्पोबाट नरिवल खसालिएको थियो । यसवर्षको रथयात्रा गएको बैशाख १८ गते पुल्चोकबाट रथ तानेर शुरू भएको हो ।

रातो मच्छिन्द्रनाथको कुलदेवी पूजा आउँदो जेठ १ गते बिहिवार हुने भएको छ । हिजो नरिवल खसाल्ने जात्राको दिन बाराही गुठियार, गुठि संस्थानका प्रतिनिधिसहितको टोलीले कूलदेवीको पूजाको साइत हेर्नुपर्ने परम्परा अनुसार आउँदो जेठ १ गतेको लागि साइत निकालेको हो ।

कूलदेवी पूजा ४ दिनसम्म गरिन्छ । मच्छिन्द्रनाथको कुलदेवी भनेर गाबहालमा रहेको पूर्णचण्डीलाई पूजा गरिन्छ । कुलदेवीको पूजाको दिन अर्थात जेठ १ गते नै रथलाई लगनखेलबाट जावलाखेल तान्नको लागि साइत हेरिनेछ ।

रथ जावलाखेलमा पुर्‍याएको चार दिनमा भोटो देखाइनेछ । भोटो जात्रापछि रातो मच्छिन्द्रनाथलाई खटमा राखेर बुंगमती लगिनेछ भने मीननाथको रथलाई तानेर टंगल लगिनेछ । त्यससँगै यसवर्षको रातो मच्छिन्द्रनाथको रथयात्रा सकिनेछ ।

Facebook Comments Box