तराईमा खानेपानी र सिँचाइको समस्याको पहिचान गर्न सिडिओहरूलाई निर्देशन

काठमाडौं । गृहमन्त्री रमेश लेखकले तराईका जिल्लाहरूमा खानेपानी र सिँचाइको समस्याको पहिचान गर्न प्रमुख जिल्ला अधिकारीहरूलाई निर्देशन दिएका छन् ।

शनिवार सिंहदरबारमा आयोजित राष्ट्रिय विपद् जोखिम न्यूनीकरण तथा व्यवस्थापन प्राधिकरणको समन्वयात्मक बैठकमा उनले यस्तो निर्देशन दिएका हुन् ।

तराई क्षेत्रमा खानेपानी र सिँचाइको समस्या जटिल बन्दै गएको छ । यसै सन्दर्भमा गृहमन्त्री लेखकले तराईका प्रमुख जिल्ला अधिकारी र स्थानीय प्रतिनिधिहरूसँग छलफल गरेका थिए । छलफलमा उनले समस्याग्रस्त स्थानहरूको पहिचान गरी सरकारलाई विवरण उपलब्ध गराउन र वैकल्पिक स्रोतहरूको खोजी तथा वैज्ञानिक वितरणको व्यवस्था मिलाउन जोड दिए ।

‘खानेपानी र सिँचाइको समस्या भएका ठाउँहरूको पहिचान गर्नुहोस् । हाल पहिचान भएका स्थानहरूको विवरणसहित थप ठाउँहरूको पनि सूची तयार पार्नुहोस्। वैकल्पिक स्रोतहरूको खोजी र व्यवस्थित वितरणको प्रबन्ध गर्नुहोस्,’ गृहमन्त्री लेखकले भने ।

यसैबीच, शुक्रवार प्रधानमन्त्रीले बोरिङमार्फत पानी आपूर्तिको घोषणा गरेका थिए । सोही अनुसार गृहमन्त्रीले आवश्यक ठाउँहरूको पहिचान छिटो गर्न र प्राथमिकताका आधारमा डिप बोरिङ ट्युबवेल जडानको प्रक्रिया अघि बढाउन निर्देशन दिए ।

आवश्यकताको प्राथमिकीकरण गरी छिटो र प्रभावकारी रूपमा डिप बोरिङ जडानको काममा ध्यान दिन उनले प्रमुख जिल्ला अधिकारीहरूलाई निर्देशन दिए ।

Facebook Comments Box