हमासले फिर्ता गरेका चार बन्धकमध्ये नेपाली विद्यार्थी विपिन जोशीसहितको शव पहिचान

जेरुसेलम, असोज २८ गते । इजरायली सेनाले मङ्गलबार हमासले फिर्ता गरेका चार जना बन्धकमध्ये एक नेपाली विद्यार्थी विपिन जोशी र इजरायली नागरिक गाइ इलुजको शव पहिचान गरिएको पुष्टि गरेको छ ।

अन्य दुई बन्धकको नाम भने परिवारको अनुरोधमा हाललाई सार्वजनिक गरिएको छैन । इजरायली सेनाले एक विज्ञप्तिमा २६ वर्षीय गाइ इलुज सन् २०२३ अक्टोबर ७ मा हमास नेतृत्वको आक्रमणका क्रममा दक्षिण इजरायलमा आयोजित नोभा सङ्गीत महोत्सवमा सहभागी भएका बेला अपहरणमा पर्नुभएको थियो ।

आक्रमणको समय उहाँ जिपमा भाग्ने प्रयासमा हुनुहुन्थ्यो र पछि रूखमा लुक्नुभएको थियो, जहाँबाट उहाँले आफ्ना आमाबाबुसँग अन्तिम सम्पर्क गर्नुभएको थियो । त्यसपछि उहाँलाई कब्जा गरी गाजामा लगिएको थियो । सेनाका अनुसार इलुज अपहरणका क्रममा घाइते हुनुभएको थियो र कैदमा रहँदा उपचारको अभावमा मृत्यु भएको थियो ।

उहाँको मृत्युको सटीक मिति सार्वजनिक नगरिए पनि सन् २०२३ डिसेम्बरमा उहाँको निधन पुष्टि गरिएको थियो । इलुज प्रसिद्ध इजरायली सङ्गीतकारका लागि ध्वनि टेक्निसियनको रूपमा कार्यरत हुनुहुन्थ्यो । २२ वर्षीय नेपाली विद्यार्थी विपिन जोशी हमासको आक्रमण हुनुभन्दा तीन हप्ताअघि मात्र कृषि तालिमका लागि इजरायल पुग्नुभएको थियो ।

उहाँ किबुट्ज अलुमिममा रहेका बेला अपहरणमा पर्नुभएको थियो । आक्रमण हुनुअघि उहाँले त्यहाँका थाई कामदारसँग शरण लिएको एउटा तस्बिर सार्वजनिक भएको थियो । इजरायली सेनाका अनुसार युद्धको पहिलो महिनामा कैदमै उहाँको हत्या गरिएको अनुमान गरिएको छ । जोशीका सहपाठी हिमाञ्चल कट्टेलले एएफपीसँगको कुराकानीमा कि आक्रमणका क्रममा आतङ्ककारीले उहाँहरू लुकेका आश्रयमा ग्रेनेड फ्याँकेका थिए, जसलाई जोशीले समातेर विस्फोट हुनुअघि बाहिर फ्याँकिदिनुभएको थियो ।

“उहाँको वीरताले मेरो ज्यान बचायो”, कट्टेलले भावुक हुँदै भन्नुभयो । होस्टेजेस एन्ड मिसिङ फेमिलिज फोरम नामक मुख्य इजरायली समूहले विज्ञप्ति जारी गर्दै भनेको छ, “गाइ र विपिनको पुनरागमनले दुई वर्षभन्दा बढी समयदेखि पीडादायी अनिश्चिततामा बाँचिरहेका परिवारलाई केही हदसम्म सान्त्वना दिएको छ । तर हामी सबै २४ जना बन्धक घर नफर्किएसम्म आराम गर्नेछैनौँ ।”

हमासले सोमबार अमेरिकी राष्ट्रपति डोनाल्ड ट्रम्पको मध्यस्थतामा सम्पन्न युद्धविराम सम्झौताको एक अङ्गका रूपमा सबै २० जना जीवित बन्धक रिहा गरेसँगै चार शव फिर्ता गरेको थियो । प्यालेस्टिनी लडाकूका हातमा अझै २४ जना बन्धकका शव छन् । ती शवलाई पनि युद्धविराम सम्झौताका सर्तअनुसार निकट भविष्यमा फिर्ता गरिने अपेक्षा गरिएको छ ।

Facebook Comments Box