गैरआवासीय नेपाली संघ विभाजनको दुई वर्षपछि एक हुँदै, ६ महिनाभित्र महाधिवेशन

नारायण किलम्बू

काठमाडौं । गैरआवासीय नेपाली संघ विभाजनको दुई वर्षपछि एक हुने भएको छ । जेन-जी आन्दोलनपछि मुलुकमा उत्पन्न नयाँ परिस्थिति र विदेशमा रहेका नेपालीमा आशाको सञ्चार गर्न आइतबार प्रधानमन्त्री सुशीला कार्कीको उपस्थितिमा एकता हुन लागेको हो । एकतापछि ६ महिनाभित्र महाधिवेशन गर्ने तयारी छ । विदेशमा रहेका नेपालीलाई गोलबद्ध गर्दै उनीहरूको हक-अधिकारका लागि स्थापित गैरआवासीय नेपाली संघ विभाजनको दुई वर्षपछि एक हुने भएको छ ।

प्रधानमन्त्री सुशीला कार्कीको उपस्थितिमा आइतबार बद्री केसी र महेशकुमार श्रेष्ठपक्षबीच एकता हुन लागेको हो । दुवै पक्षबीच ११ सदस्यीय अन्तरिम समितिको नेतृत्व केसी र श्रेष्ठले संयुक्त रूपमा गर्ने, समितिमा दुवै पक्षबाट पाँच-पाँच जना तथा एक स्वतन्त्र सदस्य रहने र ६ महिनाभित्र महाधिवेशन गर्ने सहमति भएको छ ।

नेपाली एकताबद्ध र नेपाल सुरक्षित छ भन्ने सन्देश दिन पनि एकता आवश्यक रहेको केसी र श्रेष्ठले दाबी गरेका छन् । दुई वर्षअघि अध्यक्षमा निर्वाचित बद्री केसी समूहले धाँधली गरेको आरोप लगाउँदै महेश श्रेष्ठपक्षले निर्वाचन परिणाम अस्वीकार गर्नुका साथै छुट्टै भेला गरी अर्को संस्था नै खडा गरेको थियो ।

संघ विभाजित हुँदा विदेशमा रहेका नेपालीसमेत विभाजित भएका थिए । ८० हजारभन्दा बढी सदस्य रहेको संघलाई एकताबद्ध गर्दै नेपाल र नेपालीको हकहितसँगै समृद्ध देश बनाउनका लागि लगानीको सुनिश्चितता गर्न पनि एकता महसुस भएको केसी र श्रेष्ठको भनाइ छ ।

गैरआवासीय संघले सर्वोच्च अदालतको फैसलाअनुसार विदेशमा रहेका नेपालीका लागि मतदानको व्यवस्था गर्न पनि सरकार र निर्वाचन आयोगसँग माग गरेको छ । काम वा अध्ययनको सिलसिलामा विभिन्न ९० भन्दा बढी देशमा नेपालीहरू छरिएर रहेका छन् । यो एकताले ती नेपालीमा सकारात्मक सञ्चार दिने र विदेशमा नेपाल र नेपालीप्रतिको विश्वासमा कुनै कमि नआउने विश्वास नेतृत्वको छ ।

Facebook Comments Box