चैत्र २३-२६ सम्म केन्द्रीय समितिकाे विस्तारित बैठक हुने

काठमाडौं,८ चैत्र
संयुक्त नागरिक पार्टी (संनापा) ले आगामी चैत्र २३ देखि २६ गतेसम्म केन्द्रीय समितिको विस्तारित बैठक बस्ने निर्णय गरेको छ । यहि चैत्र ०५ गतेका दिन पार्टीका अध्यक्ष दल मर्दन कामीको अध्यक्षतामा पार्टी केन्द्रीय कार्यालय बिजुलीबजारमा बसेको केन्द्रीय समितिको बैठकले गत फागुन २१ मा सम्पन्न प्रतिनिधि सभा सदस्य निर्वाचनमा प्रत्यक्ष तर्फ कुनैपनि क्षेत्रबाट जीत हासिल गर्न नसकेको र समानुपातिक तर्फपनि थ्रेसहाेल्ड कटाउन नसकेकोले त्यस विषयमा गम्भीर समिक्षा गर्दै आगामी दिनका लागि प्रभावकारी कार्यनीति तथा रणनीति बनाउनका लागि बृहत् छलफल गर्न आगामी चैत्र २३ र २४ गते पदाधिकारी समितिको र २५ र २६ गते पदाधिकारी सहित केन्द्रीय समितिकाे विस्तारित बैठक बोलाउने निर्णय गरेकाे जानकारी साे पार्टीका उपमहासचिव तथा कार्यालय प्रमुख नरेश क्षितिजले दिएक छन् ।
काठमाडौंको सामाखुसी स्थित ईम्प्याक्ट सेन्टरमा बस्ने उक्त विस्तारित बैठकमा सहभागी हुन पार्टीका केन्द्रीय पदाधिकारी,सचिवालय,केन्द्रीय सदस्य,सबै विभागीय प्रमुुख तथा पदाधिकारीहरु,प्रदेश समितिका पदाधिकारीहरु,जिल्ला समितिका पदाधिकारीहरु,प्रत्यक्ष तथा समानुपातिक तर्फका उम्मेद्वारहरु,निर्वाचन परिचालन समितिका संयोजकहरुलाई समेत आव्हान गर्दै परिपत्र जारी गरिएकाे उनले जानकारी दिएका छन् ।
केन्द्रीय कार्यलय प्रमुख क्षितिजद्वारा हस्ताक्षरित परिपत्रमा उल्लेख गरिएकाे छ ” प्रतिनिधि सभा सदस्य निर्वाचन २१ फागुन २०८२ मा प्रत्यक्ष तथा समानुपातिक तर्फ उम्मेद्वारी दिनुभएका सबै उम्मेद्वारहरु र निर्वाचनमा अहाेरात्र खटिनु भएका निर्वाचन परिचालन समितिहरु तथा प्रतिनिधिहरु, नेता कार्यकर्ताहरु,शुभेच्छुक,शुभचिन्तकहरु, तथा गितार चिन्हमा मतदान गर्नुहुने मतदाताहरु, निर्वाचनमा खटिएका कर्मचारीहरु, सुरक्षाकर्मीहरु र सुशीला कार्कीज्यु नेतृत्वकाे सरकारले मुलुकमा शान्तिपूर्ण रुपमा निर्वाचन गराउन सफल भएकाेमा सम्माननीय प्रधानमन्त्री तथा नेपाल सरकारलाई समेत धन्यवाद ज्ञापन गरेकाे छ ।”
गत ५ गते सम्पन्न बैठकमा सहभागी विभिन्न जिल्लाका अध्यक्ष/संयाेजक एवम् प्रतिनिधि तथा उम्मेद्वारहरुद्वारा प्रस्तुत रिपाेर्टहरुलाई टिपाेट गरि त्यसलाई समेत समेटेर अध्यक्ष र महासचिवद्वारा राजनीतिक प्रतिवेदनका रुपमा साे विस्तारित बैठकमा प्रस्तुत गरिने निर्णय गरेकाे जानकारी पनि उनले दिएका छन् ।