हावाहुरीसहितको भीषण वर्षाले खत्रीठाँटी बजार तहसनहस बसपार्क पुरियो, सवारी फस्यो—व्यवसायीहरूमा ठूलो क्षति

लमजुङ । सोमबार राति आएको हावाहुरीसहितको भीषण वर्षाले लमजुङको सुन्दबजार नगरपालिका–६ स्थित खत्रीठाँटी बजार क्षेत्रमा व्यापक क्षति पुर्‍याएको छ। मध्यरातपछि एक्कासि सुरु भएको आँधी र मुसलधारे वर्षाले बजार क्षेत्र अस्तव्यस्त बनाउँदै जनजीवन नै प्रभावित बनाएको हो।
तीव्र हावाहुरीले बजारका टहरा, टिनका छाना तथा कमजोर संरचनामा बनाइएका पसल र घरहरूमा ठूलो क्षति पुर्‍याएको स्थानीयले बताएका छन्। कतिपय पसलका छाना उडाएका छन् भने केही स्थानमा बिजुलीका पोल र तार ढल्दा विद्युत सेवा पूर्ण रूपमा अवरुद्ध भएको छ।
सबैभन्दा बढी असर खत्रीठाँटीको मुख्य बसपार्क क्षेत्रमा परेको छ। वर्षासँगै बगेको माटो, ढुंगा र फोहोरले बसपार्क पूरै पुरिएजस्तै भएको छ। पार्किङ गरिएका सवारी साधनहरू माटोमा गाडिएपछि बाहिर निकाल्न डोजर नै प्रयोग गर्नुपर्ने अवस्था आएको छ। स्थानीय व्यवसायी र यातायातकर्मीहरूका अनुसार यस्तो भयावह दृश्य यसअघि कहिल्यै देखिएको थिएन।
वर्षासँगै आएको भेलले नजिकका खोल्साहरू उफ्रिएर बजार क्षेत्रमा पस्दा सडकहरू नदीजस्तै बनेका थिए। तीव्र बहावका कारण पानी पसलभित्रसम्म छिरेको थियो, जसले खाद्यान्न, लत्ताकपडा लगायत दैनिक उपभोग्य सामग्रीमा ठूलो नोक्सानी पुर्‍याएको व्यवसायीहरूको भनाइ छ।
घटनापछि स्थानीय प्रशासन र प्रहरी टोली तत्कालै घटनास्थलमा पुगेर क्षतिको विवरण संकलन गरिरहेका छन्। अवरुद्ध सडक खुलाउन डोजर र अन्य उपकरण प्रयोग गरी सरसफाइ तथा माटो हटाउने काम तीव्र पारिएको छ, तर यातायात सेवा अझै पूर्ण रूपमा सञ्चालनमा आउन सकेको छैन।
हालसम्म मानवीय क्षतिको खबर नभए पनि भौतिक क्षति भने ठूलो रहेको प्रारम्भिक अनुमान गरिएको छ। स्थानीय बासिन्दा त्रासमा रहेका छन् भने मौसम अझै बिग्रिने सम्भावनाले चिन्ता थपिएको छ।
प्रभावितहरूले तत्काल राहत, पुनःस्थापना र दीर्घकालीन समाधानको माग गरेका छन्। यस प्राकृतिक विपत्तिले स्थानीयको दैनिकी मात्रै होइन, समग्र बजार अर्थतन्त्रमै गम्भीर असर पुर्‍याएको छ।

Facebook Comments Box