रुसी प्रतिशोध : किभमा भीषण मिसाइल वर्षा, एकको मृत्यु, दर्जनौँ घाइते

किभ । रुसले युक्रेनको राजधानी किभमाथि व्यापक मिसाइल तथा ड्रोन आक्रमण गरेको छ । युक्रेनी ड्रोनले रुसको नियन्त्रणमा रहेको पूर्वी लुहान्स्क क्षेत्रको स्टारोबिल्स्कस्थित एक कलेज छात्रावासलाई निशाना बनाएको दाबीपछि रुसी राष्ट्रपति भ्लादिमिर पुटिनले प्रतिशोधात्मक कारबाहीको आदेश दिएका थिए ।

शनिबार राति भएको आक्रमणमा किभका विभिन्न क्षेत्रमा शक्तिशाली विस्फोट भएका थिए । सरकारी कार्यालय, आवासीय भवन तथा विद्यालय आसपासका क्षेत्रमा लगातार मिसाइल प्रहार गरिएको युक्रेनी अधिकारीहरूले जनाएका छन् । आक्रमणमा कम्तीमा एक जनाको मृत्यु भएको छ भने २० भन्दा बढी व्यक्ति घाइते भएका छन् ।

स्थानीय प्रशासनका अनुसार आवासीय भवन, विद्यार्थी छात्रावास, सवारीसाधन मर्मत केन्द्र तथा किनमेल केन्द्रमा समेत क्षति पुगेको छ । किभका मेयर भिटाली क्लिट्स्कोले घाइतेमध्ये १५ वर्षीय किशोरसमेत रहेको जानकारी दिएका छन् । घाइतेमध्ये तीन जनाको अवस्था गम्भीर रहेको बताइएको छ ।

आक्रमणअघि युक्रेनी वायुसेनाले ‘ओरेश्निक’ नामक मध्यम दूरीको ब्यालिस्टिक क्षेप्यास्त्र प्रयोग हुन सक्ने चेतावनी जारी गरेको थियो । किभका सैनिक प्रशासक टिमुर त्काचेन्कोले राजधानीमाथि ‘विशाल ब्यालिस्टिक आक्रमण’ भइरहेको भन्दै सर्वसाधारणलाई सुरक्षित आश्रयस्थलमा बस्न आग्रह गरेका थिए ।

यता युक्रेनी राष्ट्रपति भोलोदिमिर जेलेन्स्कीले अमेरिकी तथा युरोपेली साझेदारहरूबाट रुसले ‘ओरेश्निक’ क्षेप्यास्त्र प्रयोग गर्न सक्ने सूचना प्राप्त भएको बताएका छन् । उनले अन्तर्राष्ट्रिय समुदायलाई रुसमाथि थप कूटनीतिक तथा राजनीतिक दबाब बढाउन आग्रह गरेका छन् ।

अमेरिकी विदेश मन्त्रालयले पनि किभस्थित अमेरिकी दूतावासलाई सम्भावित रुसी मिसाइल आक्रमणबारे पूर्वसूचना प्राप्त भएको जनाएको छ । पछिल्लो आक्रमणले युद्धको तनाव थप चर्किएको छ भने दुवै पक्षबीचको सैन्य टकराव अझ तीव्र बन्ने संकेत देखिएको छ ।

Facebook Comments Box