पश्चिमी प्रणालीको प्रभाव : देशभर बदली, वर्षा र हिमपातको सम्भावना

काठमाडौं । देशभर हाल पश्चिमी न्यूनचापीय प्रणाली, स्थानीय वायु तथा तल्लो वायुमण्डलमा विकसित न्यूनचापीय क्षेत्रको संयुक्त प्रभाव देखिएको छ । यसका कारण देशका विभिन्न भूभागमा बदली, वर्षा र हिमपातको अवस्था बनेको मौसम पूर्वानुमान महाशाखाले जनाएको छ ।

महाशाखाका अनुसार अहिले कोशी, मधेस, बागमती, गण्डकी र लुम्बिनी प्रदेशसहित देशका अधिकांश हिमाली तथा पहाडी क्षेत्रमा सामान्यदेखि पूर्ण बदली रहेको छ भने अन्य भूभागमा आंशिक बदली देखिएको छ । कोशी र बागमती प्रदेशका केही स्थान तथा गण्डकी र लुम्बिनी प्रदेशका थोरै स्थानमा मध्यम वर्षा भइरहेको छ ।

आज दिउँसो पनि कोशी, बागमती र गण्डकी प्रदेशसहित देशका हिमाली तथा पहाडी क्षेत्रमा सामान्य बदली कायम रहने पूर्वानुमान गरिएको छ । ती क्षेत्रका केही स्थानमा चट्याङ्गसहित मध्यम वर्षा हुने सम्भावना रहेको छ । साथै मधेस, बागमती, गण्डकी र लुम्बिनी प्रदेशका तराई क्षेत्रमा पनि एक–दुई स्थानमा वर्षा हुन सक्ने महाशाखाले जनाएको छ । उच्च हिमाली क्षेत्रमा हल्का हिमपातको सम्भावना समेत रहेको बताइएको छ ।

आज राति पनि मौसम पूर्ण रूपमा सुधार नहुने संकेत देखिएको छ । कोशी, मधेस, बागमती र गण्डकी प्रदेशसहित हिमाली भूभागमा सामान्य बदली रहनेछ भने कोशी र मधेसका थोरै स्थान तथा बागमती, गण्डकी र कर्णाली प्रदेशका हिमाली तथा पहाडी क्षेत्रमा चट्याङ्गसहित वर्षा र हिमपातको सम्भावना रहेको महाशाखाले जनाएको छ ।

मौसमविद्ले वर्षा, चट्याङ्ग र हिमपातका कारण दैनिक जनजीवन तथा सडक र हवाई यातायातमा आंशिक प्रभाव पर्न सक्ने भएकाले आवश्यक सतर्कता अपनाउन आग्रह गरेका छन् ।

Facebook Comments Box