आजको मौसम : कोशी–बागमतीसहित पहाडी क्षेत्रमा वर्षा र हिमपातको सम्भावना, तराईमा हावाहुरीको चेतावनी

काठमाडौं । नेपालमा अहिले पश्चिमी वायु र स्थानीय वायुको प्रभाव सक्रिय रहेकाले देशका विभिन्न क्षेत्रमा मौसम बदलीसँगै वर्षा भइरहेको छ। मौसम पूर्वानुमान महाशाखाका अनुसार हाल गण्डकी, बागमती र कोशी प्रदेशका केही स्थानमा वर्षा भइरहेको छ।

महाशाखाले आज दिउँसो कोशी, बागमती, गण्डकी र कर्णाली प्रदेशका हिमाली तथा पहाडी भूभागमा सामान्यदेखि आंशिक बदली रहने जनाएको छ। कोशी प्रदेशका हिमाली तथा पहाडी क्षेत्रका केही स्थानमा तथा बागमती, गण्डकी र कर्णाली प्रदेशका थोरै स्थानमा चट्याङ्गसहित मध्यम वर्षाको सम्भावना रहेको छ। उच्च हिमाली क्षेत्रमा हल्का हिमपातसमेत हुन सक्ने पूर्वानुमान गरिएको छ।

यस्तै, मधेस प्रदेश, लुम्बिनी र सुदूरपश्चिम प्रदेशका पहाडी भूभाग तथा कोशी प्रदेशको तराई क्षेत्रमा पनि एक–दुई स्थानमा मेघगर्जन र चट्याङ्गसहित वर्षा हुन सक्ने सम्भावना छ। मधेस र कोशी प्रदेशका तराई क्षेत्रमा हावाहुरी चल्ने चेतावनीसमेत दिइएको छ।

महाशाखाका अनुसार सुदूरपश्चिम र लुम्बिनी प्रदेशका केही भूभागमा तापक्रम बढ्ने सम्भावना रहेकाले गर्मी बढ्न सक्ने अनुमान गरिएको छ।

आज राति भने कोशी, बागमती र गण्डकी प्रदेशका हिमाली तथा पहाडी भूभागमा सामान्य बदली रहनेछ भने कर्णाली प्रदेशको हिमाली क्षेत्र र मधेस प्रदेशमा आंशिक बदली रहने पूर्वानुमान छ। बाँकी पहाडी तथा तराई क्षेत्रमा मौसम मुख्यतया सफा रहने जनाइएको छ।

रातिको समयमा पनि कोशी प्रदेशका थोरै स्थान तथा बागमती र गण्डकी प्रदेशका एक–दुई स्थानमा चट्याङ्गसहित हल्का वर्षा र हिमपातको सम्भावना रहेको छ। तराईका केही स्थानमा हावाहुरी चल्न सक्ने भएकाले सतर्कता अपनाउन महाशाखाले आग्रह गरेको छ।

Facebook Comments Box