अमेरिकाको मिसौरीमा विमान दुर्घटना : ११ स्काइडाइभरसहित १२ जनाको मृत्यु

काठमाडौं । अमेरिकाको मिसौरी राज्यमा भएको सानो विमान दुर्घटनामा ११ जना स्काइडाइभर र एक पाइलटसहित १२ जनाको मृत्यु भएको छ।

अधिकारीहरूका अनुसार स्काइडाइभिङ कम्पनीले भाडामा लिएको ‘प्यासिफिक एरोस्पेस पी–७५०’ मोडेलको विमान आइतबार स्थानीय समयअनुसार बिहान करिब ११ः२० बजे उडेको थियो। उडानका क्रममा विमानले आवश्यक उचाइ लिन नसकेपछि अचानक बायाँ मोडिएर बटलर मेमोरियल विमानस्थल नजिक दुर्घटनामा परेको जनाइएको छ।

बेट्स काउन्टी आपत्कालीन व्यवस्थापन कार्यालयका अनुसार विमान दुर्घटनास्थल विमानस्थलबाट करिब २०० यार्ड टाढा रहेको थियो। विमानमा सवार सबै १२ जनाको घटनास्थलमै मृत्यु भएको पुष्टि गरिएको छ।

बेट्स काउन्टीका शेरिफ चाड एन्डरसनले घटनालाई ठूलो मानवीय क्षति भएको बताएका छन्। दुर्घटनाग्रस्त विमान व्यावसायिक यात्रुवाहक नभई स्काइडाइभिङका लागि प्रयोग हुने सानो विमान रहेको उनले जानकारी दिए।

अमेरिकी संघीय उड्डयन प्रशासन (एफएए)का अनुसार दुर्घटनाको समयमा हवाई यातायात नियन्त्रण सेवा उपलब्ध थिएन। दुर्घटनाको अनुसन्धान अमेरिकी राष्ट्रिय यातायात सुरक्षा बोर्ड (एनटीएसबी)ले गरिरहेको छ भने एफएएले सहयोग गरिरहेको जनाएको छ।

हालसम्म मृतकहरूको पहिचान सार्वजनिक गरिएको छैन। उद्धार तथा अनुसन्धान टोलीले घटनाको थप विवरण संकलन गरिरहेको छ।

Facebook Comments Box