सुनसरी घटनाको प्रभाव सिरहासम्म, झडपपछि गोली चल्दा दुई जना घाइते

सिरहा, सुनसरीमा भएको साम्प्रदायिक तनावको प्रभाव सिरहासम्म पुगेपछि दुई पक्षबीच झडप हुँदा अवस्था तनावग्रस्त बनेको छ। घटनापछि स्थानीय प्रशासनले कर्फ्यु आदेश जारी गरे पनि विभिन्न स्थानमा प्रदर्शन, आगजनी र तोडफोडका घटना भएका छन्।

प्रदर्शन उग्र बन्दै गएपछि स्थिति नियन्त्रणमा लिन प्रहरीले गोली चलाएको जनाएको छ। गोली लागेर दुई जना घाइते भएका छन्। घाइतेहरूको स्थानीय अस्पतालमा उपचार भइरहेको प्रहरीले जनाएको छ।

झडपका क्रममा प्रदर्शनकारीहरूले एक मोटरसाइकल ग्यारेजमा आगजनी गरेका छन्। आगलागीबाट ११ वटा मोटरसाइकल पूर्ण रूपमा जलेर नष्ट भएको प्रहरीले जानकारी दिएको छ।

सुरक्षा अवस्था थप संवेदनशील बनेपछि प्रशासनले कर्फ्यु लागू गर्दै अतिरिक्त सुरक्षा बल परिचालन गरेको छ। सम्भावित अप्रिय घटना रोक्न संवेदनशील क्षेत्रहरूमा सुरक्षा निगरानी पनि बढाइएको छ।

स्थानीय प्रशासनले सर्वसाधारणलाई कर्फ्यु आदेशको पालना गर्न, अफवाहमा विश्वास नगर्न तथा सामाजिक सद्भाव कायम राख्न सहयोग गर्न आग्रह गरेको छ। घटनाबारे थप अनुसन्धान भइरहेको प्रहरीले जनाएको छ।

Facebook Comments Box