सिमेन्टको बोरामा लुकाइएको २०७ केजी गाँजासहित पिकअप र चालक पक्राउ

पर्सा । पर्सा प्रहरीले ठूलो परिमाणमा लागुऔषध गाँजासहित एक पिकअप गाडी र चालकलाई नियन्त्रणमा लिएको छ ।

जिल्ला प्रहरी कार्यालय पर्साका अनुसार प्रदेश ३–०१–२४ च ५३८५ नम्बरको टाटा पिकअपबाट २०७ केजी गाँजा बरामद गरिएको हो । पक्राउ पर्नेमा मकवानपुरको हेटौँडा उपमहानगरपालिका–१३ निवासी ४८ वर्षीय कृष्णा लामा रहेका छन् ।

प्रहरीका अनुसार मंगलबार साँझ करिब ६ः३० बजेको समयमा पर्साको विन्दवासिनी गाउँपालिका–५ स्थित सडकखण्डमा चेकजाँच गर्ने क्रममा पिकअपभित्र सिमेन्टको बोरामा लुकाइछिपाइ राखिएको अवस्थामा गाँजा फेला परेको थियो ।

पर्साका प्रहरी नायब उपरीक्षक (डीएसपी) चक्रबहादुर मल्लका अनुसार बरामद गरिएको गाँजा भारततर्फ लैजाँदै गरेको अवस्थामा प्रहरीले नियन्त्रणमा लिएको हो ।

प्रहरीले गाँजा, पिकअप गाडी र चालक लामालाई नियन्त्रणमा लिई लागुऔषधसम्बन्धी कसुरमा थप अनुसन्धान अघि बढाएको जनाएको छ । प्रहरीले सीमावर्ती क्षेत्रमा हुने लागुऔषध ओसारपसार नियन्त्रणका लागि निगरानी र कारबाहीलाई थप तीव्र बनाएको जनाएको छ ।

Facebook Comments Box