सरकार र कर्मचारीको कार्यक्षमतामाथि प्रदेश प्रमुख जोशीले उठाए प्रश्न

सुर्खेत । कर्णाली प्रदेशका प्रदेश प्रमुख यज्ञराज जोशीले सरकार र कर्मचारीको कार्यक्षमतामाथि प्रश्न उठाएका छन् । बजेट नै भएन भनेर भन्ने तर आएको बजेट आधा पनि कार्यान्वयन गर्न नसक्ने भन्दै जोशीले प्रश्न उठाएका हुन् ।

सोमबार कर्णाली प्रदेश सभाको सातौँ स्थापना दिवसको अवसरमा बोल्दै उनले भने, ‘असारमा हामीले सुन्न नपरोस् कि कर्णालीमा विकास बजेट २८ देखि ३० प्रतिशत मात्रै खर्च भयो भनेर । विगतमा हामीले समाचारमा सुन्दै आएका छौँ ।’

प्रदेश प्रमुख जोशीले पैसा नपाएर कर्णाली गरिब हुने, विकास नहुने तर भएको पैसा खर्च नहुने भन्दै यो जस्तो अप्ठ्यारो र लाजको विषय अरू केही नहुने बताए । ‘म कर्णाली सरकारका पदाधिकारीदेखि कर्मचारीलाई प्रश्न गर्छु । बजेट खर्च किन हुन सक्दैन ?’, उनले भने, ‘अझै समय छ तपाईँहरूले सोच्नुहोस् ।’

प्रदेश प्रमुख जोशीले बजेटको कार्यान्वयन गरेमा कर्णालीमा धेरै विकास हुने भएकाले गम्भीर भएर सोच्न आग्रह गरे । कर्मचारीले दत्तचित्त भएर काम गर्न सुझाव उनको छ । साथै कर्णालीको विकासमा सबै दलहरू एकजुट भएर अघि बढ्न उनले आग्रह गरे ।

‘पहिलो प्रदेश सभामा अभावको कर्णालीलाई सम्पन्न कर्णाली बनाउने सबैले बाचा गर्नुभयो, आज ७ वर्ष बित्दा हामी कहाँ पुग्यौँ, छलफलको विषय बन्छ,’ जोशीले थपे, ‘यो विषयमा समीक्षा गर्नुहोस्, केही नभएको त हैन तर जसरी हुनुपर्थ्यो त्यसरी कामहरू हुन सकेका छैनन् ।’

प्रदेश प्रमुख जोशीले सबैको जोस, जाँगर र समर्पणले कर्णालीलाई अगाडि बढाउन सकिने भएकाले त्यतातर्फ ध्यान दिन सुझाव दिए । त्यसका लागि सबैले साझा प्रतिबद्धता अनुसार काम गर्नुपर्ने उनले बताए ।

Facebook Comments Box