हावाहुरीको कहर : सिरहामा पर्खाल भत्किँदा महिलाको मृत्यु

सिरहा । शनिबार साँझ आएको तीव्र हावाहुरीले सिरहामा एक महिलाको ज्यान लिएको छ। सखुवानन्कारकट्टी गाउँपालिका–२ मकरामपुरकी ६० वर्षीया किसुनवती यादवको घरको पर्खाल भत्किँदा मृत्यु भएको हो।

स्थानीय विन्देश्वर यादवकी श्रीमती किसुनवती घरभित्रै बसिरहेको अवस्थामा अचानक आएको हावाहुरीले जस्तापाता उडाएको थियो। जस्तापाता उडेपछि घरको पर्खाल भत्किँदा इँटाले टाउकोमा गम्भीर चोट लागेकी उनी घटनास्थलमै मृत अवस्थामा फेला परेकी थिइन्।

जिल्ला प्रहरी कार्यालय सिरहाका प्रवक्ता तथा प्रहरी नायब उपरीक्षक रमेशबहादुर पालका अनुसार घटनालगत्तै प्रहरी टोली घटनास्थल पुगेको थियो। प्रहरीले आवश्यक मुचुल्का प्रक्रिया पूरा गरी शव परीक्षणका लागि पठाइसकेको जनाएको छ।

शनिबार राति मधेस प्रदेशका विभिन्न जिल्लामा आएको हावाहुरीले जनजीवन प्रभावित बनाएको छ। अन्य स्थानमा भएको क्षतिको विवरण सङ्कलन गर्ने काम जारी रहेको प्रहरीले जनाएको छ।

Facebook Comments Box