सुनकोशीमा डुबेका उदयपुरका पुरुष पाँच दिनपछि मृत फेला

उदयपुर — माछा मार्ने क्रममा सुनकोशी नदीमा डुबेर बेपत्ता भएका उदयपुरका एक पुरुष पाँच दिनपछि मृत अवस्थामा फेला परेका छन्। लिम्चुङबुङ गाउँपालिका–५ चौलानेका ५१ वर्षीय रामशेर राई आइतबार मृत फेला परेका हुन्।

जिल्ला प्रहरी कार्यालय उदयपुरका सूचना अधिकारी डीएसपी निरञ्जन थापाका अनुसार राई अन्य आठ जनासँग माछा मार्न गएका बेला लिम्चुङबुङ गाउँपालिका–४ सानरलुङस्थित सुनकोशी नदीबाट बेपत्ता भएका थिए। घटनापछि प्रहरी टोलीले निरन्तर खोजतलास जारी राखेको थियो।

खोजीका क्रममा राईको शव रौतामाई गाउँपालिका–३ भदौरे किनारमा फेला परेको प्रहरीले जनाएको छ।

शव फेला परेपछि आवश्यक कानुनी प्रक्रिया पूरा गरी पोस्टमार्टमका लागि जिल्ला अस्पताल उदयपुरमा ल्याइएको प्रहरीले जानकारी दिएको छ।

Facebook Comments Box