कक्षा १२ परीक्षाअघि शिक्षामन्त्री सस्मित पोखरेलको शुभकामना : “आत्मविश्वासका साथ परीक्षा दिनुहोस्”

काठमाडौं । कक्षा १२ को वार्षिक परीक्षा सुरु हुनुअघि शिक्षामन्त्री सस्मित पोखरेलले सम्पूर्ण परीक्षार्थीलाई शुभकामना व्यक्त गरेका छन्।

परीक्षाको पूर्वसन्ध्यामा सन्देश जारी गर्दै मन्त्री पोखरेलले विद्यार्थीहरूलाई आत्मविश्वासका साथ परीक्षा दिन आग्रह गरेका हुन्। उनले विद्यालय शिक्षाको महत्वपूर्ण खुड्किलो पार गर्दै उच्च शिक्षा तथा नयाँ अनुभवको यात्रातर्फ अघि बढ्न लागेको भन्दै परीक्षार्थीहरूको उज्ज्वल भविष्यको कामना गरे।

उनले भने, “विद्यालय शिक्षाको यो खुड्किलो पार गरेपछि तपाईँहरू थप नयाँ अनुभव र गहन सिकाइको बृहत् यात्रातर्फ अघि बढ्दै हुनुहुन्छ। यो परीक्षा केवल अंकको मापन मात्र होइन, यहाँहरूको मेहनत र लगनशीलताको प्रतिबिम्ब पनि हो।”

मन्त्री पोखरेलले परीक्षालाई डरको विषय नभई आफ्नो क्षमता प्रस्तुत गर्ने अवसरका रूपमा लिन सुझाव दिँदै नआत्तिकन संयमित र आत्मविश्वासी भएर परीक्षा दिन आग्रह गरे।

यससँगै उनले सबै परीक्षार्थीलाई सफलताको शुभकामना दिँदै सकारात्मक सोच, निरन्तर अभ्यास र धैर्यताले उत्कृष्ट परिणाम ल्याउने विश्वास व्यक्त गरे।

Facebook Comments Box