बर्दियामा अतिक्रमणविरुद्ध कडाइ : वन क्षेत्र खाली गर्न १५ दिने अल्टिमेटम

बर्दिया । जिल्लाका विभिन्न सामुदायिक वन क्षेत्रमा बढ्दो अतिक्रमण रोक्न डिभिजन वन कार्यालयले कडाइ गरेको छ। कार्यालयले अतिक्रमित वन क्षेत्रमा बनाइएका घरटहरा तथा खेती गरिएको जमिन खाली गर्न १५ दिने सार्वजनिक सूचना जारी गरेको हो।

डिभिजन वन क्षेत्रअन्तर्गत पर्ने कोठियाघाट, माचडचोक, संगमबस्ती, खुरखुरेफाँटा, रामबस्ती तथा अमर महिला सामुदायिक वनलगायत विभिन्न स्थानमा अनधिकृत रूपमा बसोबास र खेती भइरहेको पाइएको छ। यसरी वन क्षेत्र अतिक्रमण गरेर बनाइएका संरचना र उपयोगमा ल्याइएका जमिन तत्काल खाली गर्न कार्यालयले निर्देशन दिएको छ।

डिभिजन वन कार्यालयका वरिष्ठ वन अधिकृत रामगोपाल चौधरीका अनुसार तोकिएको समयभित्र अतिक्रमित क्षेत्र खाली नगरे कडा कारबाही अघि बढाइनेछ। “सूचना बेवास्ता गरेमा वन ऐन, २०७६ अनुसार सजायका साथै अतिक्रमण हटाउँदा लागेको सम्पूर्ण खर्चसमेत सम्बन्धित व्यक्तिबाट असुल गरिनेछ,” उनले स्पष्ट पारे।

वन संरक्षण र जैविक विविधता जोगाउन यस्तो कदम आवश्यक भएको कार्यालयको भनाइ छ। पछिल्लो समय वन क्षेत्रमा बढ्दो मानवीय हस्तक्षेपले वातावरणीय सन्तुलनमा असर पार्न थालेपछि प्रशासनले नियन्त्रण अभियानलाई तीव्र बनाएको हो।

स्थानीय तह, सामुदायिक वन उपभोक्ता समूह तथा सुरक्षा निकायसँग समन्वय गरी अतिक्रमण हटाउने अभियान प्रभावकारी बनाइने डिभिजन वन कार्यालयले जनाएको छ।

Facebook Comments Box