माइतीघर मण्डलामा झडप: धर्नास्थलमा पुगेपछि अम्बिका बस्नेत र शोभा पाठकबीच तनाव

काठमाडौं — आइतबार दिउँसो माइतीघर मण्डलामा धर्ना कार्यक्रमका क्रममा दुई पक्षबीच झडप हुँदा केही समयका लागि अवस्था तनावपूर्ण बनेको छ। नेकपा एमाले नेता महेश बस्नेतकी पत्नी अम्बिका बस्नेत र अभियन्ता शोभा पाठकबीच विवाद चर्किँदै हात हालाहालको अवस्थासम्म पुगेपछि प्रहरीले हस्तक्षेप गर्नुपरेको हो।

दिउँसो करिब १२ बजेतिर भएको घटनामा शोभा पाठक, रस्मिला धामी लगायतका युवतीहरू सुधन गुरुङको पुनर्वहालीको माग गर्दै धर्नामा बसिरहेका थिए। सोही क्रममा अम्बिका बस्नेत आफ्नो समूहसहित धर्नास्थल पुगेपछि दुवै पक्षबीच भनाभन सुरु भएको प्रत्यक्षदर्शीहरूले बताएका छन्। केहीबेरमै विवाद झडपमा परिणत हुँदा स्थिति अस्थिर बनेको थियो।

स्थिति नियन्त्रणबाहिर जान थालेपछि प्रहरी टोलीले तत्काल हस्तक्षेप गरी दुवै पक्षलाई छुट्याएको थियो। घटनापछि प्रहरीले अम्बिका बस्नेतसहित केही महिलालाई नियन्त्रणमा लिएको जनाएको छ। झडपपछि माइतीघर क्षेत्रमा केहीबेर सुरक्षा सतर्कता बढाइएको थियो।

यसअघि अभियन्ता शोभा पाठकले महेश बस्नेतमाथि कारबाहीको माग गर्दै अनशनसमेत बसेकी थिइन्। अनशनकै क्रममा तत्कालीन गृहमन्त्री सुधन गुरुङले भेटेपछि उनले अनशन तोडेकी थिइन्। गुरुङले पदबाट राजीनामा दिएपछि पनि पाठकले उनको पुनर्वहालीको माग गर्दै आन्दोलन जारी राखेकी छन्।

प्रहरीका अनुसार घटनाबारे थप अनुसन्धान भइरहेको छ भने विस्तृत विवरण आउन बाँकी छ।

Facebook Comments Box