काठमाडौँको सुरक्षा सुदृढीकरणमा एसएसपी रमेश थापाको प्रभावकारी कमाण्ड

काठमाडौँ । नेपाल प्रहरीका अनुभवी र सफल कमाण्डरका रूपमा परिचित एसएसपी रमेश थापाले काठमाडौँ प्रहरी प्रमुखको जिम्मेवारी सम्हालेपछि राजधानीको सुरक्षा व्यवस्थापनमा उल्लेखनीय सुधार ल्याएका छन्।

उनको नेतृत्वमा काठमाडौँमा उच्च सुरक्षा सतर्कता अपनाउँदै सम्भावित हिंसात्मक गतिविधि र अशान्तिलाई न्यून गर्न विशेष रणनीतिहरू कार्यान्वयन गरिएका छन्। उच्च जोखिमयुक्त क्षेत्रहरूमा सुरक्षाकर्मीहरूको प्रत्यक्ष निगरानी बढाइएको छ भने आवश्यक निर्देशनमार्फत सुरक्षा संयन्त्रलाई थप मजबुत बनाइएको छ।

एसएसपी थापाको कमाण्डमा कडा अनुगमन र सक्रिय परिचालनका कारण ठूला अप्रिय वा हिंसात्मक घटनाहरू हुन नपाएको प्रहरी स्रोत बताउँछ। उनले हिंसात्मक गतिविधिमा संलग्न हुन खोज्ने व्यक्तिलाई कानुनी दायरामा ल्याउन स्पष्ट निर्देशन दिएका छन्।

उनको कार्यकालमा गुण्डागर्दी तथा आपराधिक गतिविधिमा संलग्न व्यक्तिहरूविरुद्ध लक्षित अपरेसन सञ्चालन गरिएको छ, जसले राजधानीको शान्ति सुरक्षामा सकारात्मक प्रभाव पारेको देखिन्छ। यसअघि पोखरा (कास्की) र उदयपुरमा प्रहरी प्रमुखका रूपमा कार्यरत रहँदा पनि उनले अपराध नियन्त्रणमा प्रभावकारी भूमिका निर्वाह गरेका थिए।

अनुशासित कार्यशैलीका लागि परिचित एसएसपी थापा मातहतका प्रहरीलाई व्यवस्थित रूपमा परिचालन गर्ने र स्थानीय समुदायसँग समन्वय गरेर काम गर्ने अधिकारीका रूपमा चिनिन्छन्।

काठमाडौँको कमाण्ड सम्हालेपछि उनले थापाथली र बानेश्वरको गैरीगाउँस्थित बागमती नदी किनारमा रहेका अनधिकृत सुकुम्बासी बस्तीहरू कुनै अप्रिय घटना बिना नै खाली गराउन सफल भएका छन्।

प्रहरी वृत्तमा उनी एक व्यावसायिक अधिकृतका रूपमा स्थापित छन्। उच्च निष्ठा र जिम्मेवारीका साथ उनले काठमाडौँको सुरक्षा व्यवस्थापनलाई सुदृढ बनाउँदै लगेको बताइएको छ।

Facebook Comments Box