न्यूरोडको शिव फुड्सलाई ५० हजार जरिवाना, खाद्य वस्तुमा किराको भेट

काठमाडौँ । काठमाडौँ महानगरपालिकाले न्यूरोडस्थित ‘श्री शिव फुड्स प्रा.लि.’ लाई ५० हजार रुपैयाँ जरिवाना गरेको छ । पसलले बिक्री गरेको खाद्य वस्तुमा साङ्लो (किरा) भेटिएपछि महानगरपालिकाको कृषि तथा पशुपन्छी विभागले उक्त कारबाही गरेको हो ।

वैशाख १६ गते एक उपभोक्ताले न्यूरोडस्थित उक्त पसलबाट खरिद गरेको खाद्य वस्तुमा साङ्लो भेटिएको भन्दै महानगरमा उजुरी दिएका थिए । उजुरीसँगै उनले प्रमाणका रूपमा फोटो र भिडियोसमेत पेश गरेका थिए ।

प्राप्त प्रमाणहरूको अध्ययन तथा अनुसन्धानपछि सो खाद्य वस्तुमा साङ्लोजस्तो देखिने किट रहेको पुष्टि भएको महानगरको प्रतिवेदनमा उल्लेख छ ।

महानगरको कृषि तथा पशुपन्छी विभागका प्रमुख नुरनिधि न्यौपानेका अनुसार उक्त व्यवसायलाई ५० हजार रुपैयाँ जरिवाना असुल गरिएको छ । साथै, आगामी दिनमा यस्ता कमजोरी नदोहोर्‍याउन निर्देशन दिइएको उनले बताए ।