अध्यादेश स्वीकृत नगर्न राष्ट्रपतिलाई विपक्षी दलको आग्रह

काठमाडौँ । संसदका प्रमुख प्रतिपक्ष दलहरूले सरकारले हालै ल्याएका अध्यादेशहरू स्वीकृत नगर्न राष्ट्रपति रामचन्द्र पौडेल समक्ष आग्रह गरेका छन्।

बुधबार सिंहदरबारमा बसेको श्रम संस्कृति पार्टीबाहेकका विपक्षी दलहरूको संयुक्त बैठकले अध्यादेशप्रति गम्भीर असहमति जनाउँदै त्यसलाई रोक्न राष्ट्रपतिसमक्ष औपचारिक आग्रह गर्ने निर्णय गरेको हो। विपक्षी दलहरूले संसद् छल्दै अध्यादेश ल्याइएको आरोप लगाउँदै यसले लोकतान्त्रिक प्रक्रिया र संसदीय अभ्यासमाथि प्रश्न उठाएको बताएका छन्।

बैठकपछि जारी धारणा अनुसार सरकारले पर्याप्त छलफल र सहमति बिना अध्यादेश ल्याउनु उचित नभएको ठहर गरिएको छ। उनीहरूले यस्ता निर्णयले संविधानको भावना विपरीत जाने र सत्ता पक्षले आफ्नो सुविधा अनुसार शासन चलाउन खोजेको संकेत गर्ने बताएका छन्।

विपक्षी दलहरूले अध्यादेश फिर्ता लिन वा संसद्मा विधेयकका रूपमा पेश गरी खुला बहस गर्न सरकारलाई दबाब दिने तयारी समेत गरेका छन्। साथै, आगामी दिनमा यस विषयमा थप रणनीति तय गर्न निरन्तर छलफल गर्ने जनाइएको छ।

Facebook Comments Box