ठमेलबाट २० युगाण्डाली युवती पक्राउ, अनैतिक गतिविधिमा संलग्नता आरोप

काठमाडौं । ठमेल क्षेत्रबाट अनैतिक गतिविधिमा संलग्न रहेको आरोपमा २० विदेशी युवतीलाई प्रहरीले पक्राउ गरेको छ। प्रहरीका अनुसार युगाण्डाबाट नेपाल आएका ती युवतीहरू वेश्यावृत्ति लगायत गतिविधिमा सक्रिय रहेको सूचनाका आधारमा विशेष निगरानीपछि नियन्त्रणमा लिइएको हो।
जिल्ला प्रहरी परिसर काठमाडौंका अनुसार ठमेल क्षेत्रमा घुम्न आउने पर्यटकलाई सार्वजनिक स्थलमै हैरानी दिने, पैसामा बार्गेनिङ गर्ने तथा अनैतिक प्रस्ताव राख्ने गतिविधि बढेपछि अपरेसन चलाइएको थियो। सोही क्रममा २० जनालाई नियन्त्रणमा लिइएको प्रहरीले जनाएको छ।
प्रहरी प्रवक्ता एसपी पवन कुमार भट्टराईका अनुसार पक्राउ परेकामाथि आवश्यक अनुसन्धान अघि बढाइएको छ। उनीहरूलाई थप अनुसन्धानका लागि जिल्ला प्रशासन कार्यालय काठमाडौंबाट १२ दिन थुनामा राख्ने अनुमति समेत लिइएको छ।
प्रहरीले ठमेल क्षेत्रमा यस्ता गतिविधि नियन्त्रण गर्न निगरानी अझ कडा बनाउने जनाएको छ। साथै, सार्वजनिक स्थानमा अशोभनीय तथा गैरकानुनी गतिविधि नगर्न सबैलाई सचेत गराएको छ।

Facebook Comments Box