देश खरानी बनाउनेलाई सुशीला सरकारको संरक्षण, आसन्न निर्वाचनमा जनता निर्णायक

भदौ २३ र २४ गतेको जेनजी प्रदर्शनमा सिंहदरबार, सर्वोच्च अदालतसहित सयौं सरकारी कार्यालय जलाइयो । ती कार्यालय खरानी बनेको छ । सर्वोच्चले अदालतमा आगजनी गर्नेविरुद्ध प्रहरीमा जाहेरी दियो । यता, अन्य सरकारी निकायले पनि जाहेरी दिने तयारी गरिरहेको थियो ।

प्रहरीले प्रदर्शनको नाममा अराजक गतिविधिमा संलग्नहरुलाई समात्न भिडियो, फोटो प्रमाण संकलन गरिरहेको थियो । ४१ हजार बढी भिडियो संकलन गरिसकिएको थियो । त्यसैले ५९१ जना पक्राउ परिसकेका थिए । प्रदर्शनमा प्रहरीमाथि आक्रमण भएको छ । तीन जना प्रहरी अधिकृतलाई कुटेर मारियो ।

नेपालीहरुको मुटु सिंहदरबार जलाएर फोटो खिचियो । देशमा सुशासनका लागि बनेको सुशीला कार्की नेतृत्वको सरकारले पक्राउ परेका सबैलाई छोडिदियो । अन्यलाई पनि पक्राउ नगर्ने भनि क्याबिनेटबाट निर्णय गरियो । दुई दिने आन्दोलनमा सार्वजनिक सम्पत्तिमा ८४ अर्ब ७७ करोड ४५ लाख रुपैयाँबराबरको क्षति भएको छ ।

यो जनताले तिरेको करबाट निर्माण भएको संरचना हो । यी संरचना निर्माण गर्न त्यति नै खर्च लाग्छ । त्यो पैसा कहाँबाट ल्याउने ? देशको अर्थतन्त्र डामाडोल छ । त्यसैले यी संरचनालाई पुरानै रुपमा फर्काउन धेरै गाह्रो छ । अर्कोतिर, निजी सम्पत्तिमा पनि ठूलो क्षति भएको छ ।

व्यवसायीहरुले आफ्नो दुःखपसिनाको कमाइ र ऋण ल्याएर व्यवसाय खडा गरेका थिए । त्यहाँ अब खरानीको अवशेष मात्र बाँकी छ । आक्रोश पोख्ने नाममा सरकारी सम्पत्ति जलाउने, निजी सम्पत्तिमा आगजनी, तोडफोड र लुटपाट गर्नेलाई सुशीला सरकारले छोडिदिएको छ ।

अपराधीहरुलाई धमाधम छोडेपछि जनताले कसरी यहाँ सुरक्षित महसुश गर्न सक्छन् ? निजी क्षेत्रले कसरी लगानी गर्छन् ? विदेशीहरु के देखेर नेपाल आउने ? भोलि पनि आन्दोलनको नाममा यिनै गतिविधि हुँदैन भन्ने के ग्यारेण्टी ? सरकार जोगाउनका लागि अपराधीहरुलाई छोडिराख्ने हो भने देश उमो लाग्छ ?

सुशासन कायम हुन्छ ? सुशीलालाई प्रधानमन्त्री बनाउन रास्वपाका सभापति रवि लामिछाने र काठमाडौं महानगरपालिकाका तत्कालीन मेयर बालेन्द्र साहले समर्थन जनाएका थिए । वर्तमान गृहमन्त्री त बालेनले महानगरमा नियुक्त गरेको कानुनी सल्लाहकार हो । बालेन र रविकै योजनामा २८ वर्षभन्दा मूनिका उमेर समूहलाई भदौ २३ र २४ गते सडकमा ओरालिएको थियो ।

देशलाई खरानी बनाउने बालेन र रवि हो । दुईले सुनियोजित रुपमा देश ध्वस्त पारेका हुन् । मुलुकको सम्पत्ति खरानी बनाउन उक्साउने, पर्दापछाडि बसेर प्लानिङ गर्नेहरु अहिले देश बनाउँछौं भन्दै हिँडेका छन् । गौरीबहादुर कार्की नेतृत्वको छानबिन आयोगले कारबाही गर्नुपर्ने भनि सिफारिस गरेको व्यक्तिहरु पनि चुनावी मैदान छन् ।

अपराधीहरु राजनीतिमा आउँदा कोही भने बोलेकै आधारमा समातिरहेका छन् । मेडिकल व्यवसायी दुर्गा प्रसाईँले बोल्ने वा सामाजिक सञ्जालमा लेख्नेबित्तिकै सरकारले पक्राउ गर्छ । बिनाकारण प्रहरी हिरासतमा राख्छ । उता, सरकारी सम्पत्ति खरानी बनाउनेलाई चाँहि सरकारले छोड्छ ? सुशीला सरकारको यो कस्तो खालको सुशासन हो ?

फागुन २१ गतेपछि सुशीला कार्कीको सरकार हट्छ । जनताबाट चुनिएर आएका नेताहरुले सत्ता सम्हाल्छन् । चुनाव जित्नका लागि अहिले रवि, बालेन र रास्वपाले हरकोसिश गरिरहेको छ । किन कि, यिनीहरुलाई यो राम्ररी थाहा छ कि अरु राजनीतिक दलको सरकार बन्यो भने यिनीहरुको बास जेलमा हुन्छ ।

देश जलाउने हो को ? अहिले आएर प्रष्ट भएको छ । पहिले जेनजी–जेनजी भनियो । तर, जेनजी त रहेनछन् । उनीहरु भएको भए, चुनावमा आउँथे होला । सुधन गुरुङले आफूलाई जेनजीको लिडर भन्थें । अहिले उनी रास्वपाबाट चुनावमा उठेका छन् । आन्दोलन जेनजीले गरेको रहेछ कि रवि र बालेनले ? बुझ्नलाई यही उदाहरण काफी छ ।

भदौ २४ गते सुशीला कार्की आफैं सडकमा आएकी छिन् । उनले आन्दोलनलाई झन् उग्र बनाएकी थिइन् । फागुन २१ पछि राजनीतिक दलको सरकार बन्यो भने कार्की जेल जान्छिन् । रास्वपा पहिलेभन्दा धेरै कमजोर भइसकेको छ । जनताले यिनकै योजनामा देश खरानी भयो भन्ने कुरा बुझिसकेका छन् ।

भनिन्छ नि,‘अपराध गर्नेहरु ढिलो भएपनि कानुनको फन्दामा परिहाल्छन् ।’ प्रहरीले अपराध गर्नेलाई ३६ वर्षपछि समातेको घटना पनि छ । सुशीला हुञ्जेल देश जलाउनेहरु बच्छन् । त्यसपछि समातिन्छन् । कि त पहिलो पार्टी बनेर आफ्नो एकल सरकार बनाउनुपर्यो । रास्वपाको कुनैपनि हालतमा पहिलो पार्टी बन्दैन ।

कि काँग्रेस हुन्छ कि नेकपा । राजनीतिक दलले देश खरानी बनाउनेलाई छोड्छन् ? यिनीहरु जसरी पनि कानुनको कठघरामा पुग्छन् । सुशीला विगतदेखि नै रविको पक्षधर हुन् । रविले सहकारी ठगेको विषयलाई उनले राजनीतिक प्रतिशोध भन्दै आएकी थिइन् । पछि बालेनलाई भाइ र सुधनलाई जेठो छोरा बनाइन् ।

सुशीला आएपछि जेलमा भएको रवि निस्किए । रवि छुटाउनमा कसको कति भूमिका छ ? यो भनिरहनपर्ने आवश्यकता छैन । जनता आफैं बुझ्छन् । सर्वसाधारण भन्छन्,‘सिंहदरबार, सर्वोच्च अदालतलगायत सरकारी सम्पत्ति जलाउने जोसुकै भएपनि कारबाही हुनुपर्छ ।’ अहिलेको सरकारले छोडेपनि निर्णायक भनेको जनता हुन् ।

जनताले चाहे भने देश खरानी बनाउनेलाई सजाय दिन सक्छन् । देश जलाउनेहरुलाई मतदान नगर्नु नै उनीहरुले सजाय पाउनु हो । त्यसैले जनताले सोचविचार गरेर मात्र मतदान गरौं । देश जलाउनेहरुलाई सदनमा पुर्याइयो भने देशको झनै दुर्गति हुन्छ । देशमा लगानीको वातावरण बन्दैन ।

लगानी नै नभएपछि कर उठ्दैन । कर बिना देश विकास असम्भव छ । रोजगारी पाइँदैन । रवि भदौ २४ गते जेलबाट भागेपछि अन्य कैदीबन्दी पनि भागे । तीमध्ये कतिपय आफैं कारागार फर्किए । अन्यलाई प्रहरीले पक्राउ गरिरहेको छ । सरकारी सम्पत्ति जलाउनेहरु बाहिरै हुँदा तिनलाई चाँहि किन समात्नुपर्यो ?

छोडिदिए भइहाल्यो नि । कुनैलाई कानुन लाग्ने, कुनैलाई कानुन नलाग्ने, यो कहाँको नीति हो ? ‘ठूलालाई चैन, सानालाई ऐन’ अहिले चरितार्थ भइरहेको छ । आफ्नालाई सुशिलाले बचाइहालिन् । अरु जेल गए । बंगलादेशमा भर्खरै चुनाव भयो । त्यहाँका जनताले देश जलाउनेलाई ठीक ठाउँ देखाइदिए ।

जेनजी भनाउँदाहरु ६ सीटमा सीमित भएका छन् । नेपालमा पनि जनता सचेत भ एभने देश जलाउनेहरु सही ठाउँमा पुग्छन् । यो देश झण्डै तीन करोड जनताको हो । सुशीला अहिले देशको प्रधानमन्त्री हो । तर, उनी देशको प्रधानमन्त्री हुन सकिनन् । बस् बालेन, रवि, सुधन र देश जलाउनेहरुको प्रधानमन्त्री भइन् ।

सुशीलाको देखाउने र चपाउने दाँत छुट्टाछुट्टै रहेछिन् । सुशासनको सरकारमा बसेर उनले कुशासनको नमूना स्थापित गरिन् । न भ्रष्टाचारीलाई कारबाही भयो न देशमा सुशासन नै कायम भयो । उनी प्रधानमन्त्री बनेपछि अपराधीहरुको मनोबल झनै बढ्यो । देशमा अपराध बढ्यो ।
यहाँ जोपनि सत्तामा नपुग्दासम्म मात्र ठूला कुरा गर्ने हुन् । सत्तामा पुगेपछि सबै उस्तै हुन् भन्ने नमूना सुशीला कार्की पनि हुन् ।अनुसा थापा

Facebook Comments Box