वंशीघाट सुकुम्बासी बस्तीमा डोजर : कडा सुरक्षा, स्थानीय त्रसित

काठमाडौँ । काठमाडौँ महानगरपालिका–टेकुस्थित वंशीघाटमा रहेको सुकुम्बासी बस्तीमा आज डोजर चलाइएको छ । जिल्ला प्रशासन कार्यालय काठमाडौँले पूर्वसूचना जारी गरेसँगै बस्तीका बासिन्दा बिहानैदेखि आफ्नो सामान सुरक्षित स्थानतर्फ सार्न बाध्य भएका छन् ।

डोजर परिचालनसँगै क्षेत्रको सुरक्षा व्यवस्था अत्यन्त कडा बनाइएको छ । बिहानैदेखि नेपाल प्रहरी र सशस्त्र प्रहरी बलको बाक्लो उपस्थिति देखिएको छ भने पत्रकार र स्थानीय बासिन्दालाई समेत प्रभावित क्षेत्रमा प्रवेश गर्न रोक लगाइएको छ ।

अचानक गरिएको कडाइका कारण दैनिक जीवनसमेत प्रभावित बनेको छ । बिहान तरकारी किन्ने उद्देश्यले घरबाहिर निस्किएका स्थानीयसमेत घर फर्कन नपाएको गुनासो गरेका छन् ।

बस्ती हटाउने सरकारी निर्णय कार्यान्वयनसँगै त्यहाँ बसोबास गर्दै आएका सुकुम्बासीहरू अन्योल र त्रासमा रहेका छन् । उनीहरूले वैकल्पिक व्यवस्थाबारे स्पष्ट जानकारी नपाएको भन्दै चिन्ता व्यक्त गरेका छन् ।

Facebook Comments Box