साताव्यापी सार्वजनिक बिदा सुरु: होली, निर्वाचन र महिला दिवसले जोड्यो लामो अवकाश

काठमाडौँ । राजधानीमा आजदेखि साताव्यापी सार्वजनिक बिदा सुरु भएसँगै उपत्यकाको जनजीवनमा चहलपहल बढेको छ। फागुन १८ र १९ गते मनाइने Holi (होली) को सार्वजनिक बिदापछि फागुन २०, २१ र २२ गते निर्वाचन प्रयोजनका लागि बिदा दिइएको छ। त्यसपछि २३ गते शनिबार र २४ गते International Women’s Day परेकाले लगातार सात दिन सार्वजनिक बिदा जुरेको हो।
लगातार बिदाले उपत्यकाबाट गाउँ फर्किनेहरूको संख्या ह्वात्तै बढेको छ। विशेषगरी आसन्न निर्वाचनलाई लक्षित गर्दै मतदाता आ–आफ्नो गृहजिल्ला जाने क्रम तीव्र बनेको छ।
काठमाडौँ उपत्यकाका मुख्य नाका तथा बसपार्कहरूमा बिहानैदेखि यात्रुको भीड देखिन थालेको छ। टिकट काउन्टर अगाडि लामो लाइन, सार्वजनिक सवारीसाधनमा यात्रुको चाप र ट्राफिक व्यवस्थापनमा व्यस्त सुरक्षाकर्मीको सक्रियता देख्न सकिन्छ।
यातायात व्यवसायीहरूका अनुसार यात्रुको चापलाई मध्यनजर गर्दै अतिरिक्त सवारीसाधन सञ्चालनमा ल्याइएको छ। ट्राफिक प्रहरीले पनि सवारी आवागमन सहज बनाउन विशेष व्यवस्था मिलाएको जनाएको छ।
यस साताव्यापी बिदाले एकातिर पर्वको उल्लास थपेको छ भने अर्कोतर्फ निर्वाचनको माहोललाई समेत तातेको छ। राजधानी यतिबेला आंशिक रूपमा खाली हुन थालेको छ भने गाउँघरमा भने चहलपहल बढ्ने अनुमान गरिएको छ।

Facebook Comments Box