जबर्जस्ती करणी आरोपमा सुशील केसी पक्राउ, अनुसन्धान जारी

ललितपुर, असार ६ । जबर्जस्ती करणीको आरोपमा बारा जिल्लाको सिमरा क्षेत्रमा होटल व्यवसाय सञ्चालन गर्दै आएका सुशील केसी पक्राउ परेका छन्। जिल्ला प्रहरी परिसर ललितपुरमा एक महिलाले दिएको जाहेरीका आधारमा उनलाई पक्राउ गरी अनुसन्धान अघि बढाइएको प्रहरीले जनाएको छ।

प्रहरीमा दर्ता गरिएको जाहेरीअनुसार ललितपुरको महालक्ष्मी नगरपालिका–१, इमाडोलमा गत चैत २२ गते राति करिब ९ः३० बजे उक्त घटना भएको आरोप लगाइएको छ। पीडित महिलाले आफू गोदावरी नगरपालिका–१३, झरुवारासी आरुबोट निवासी रहेको उल्लेख गरेकी छन्।

जाहेरीमा केसीले अत्यधिक मदिरा सेवन गरेको अवस्थामा आफूमाथि जबर्जस्ती करणी गरेको तथा घटनाअघि जबर्जस्ती मदिरा पिलाएको आरोप लगाइएको छ। पीडितका अनुसार उनका श्रीमान्को २०८२ साल वैशाखमा निधन भएको थियो र शोकको अवस्थामै नाताले भाइ पर्ने केसीबाट आफू हिंसामा परेको दाबी गरेकी छन्।

पीडित महिलाले घटनापछि आरोपीले बाहिर कुरा नगर्न दबाब दिँदै विभिन्न किसिमका मानसिक तनाव दिएको उल्लेख गरेकी छन्। त्यसका कारण आफू मानसिक रूपमा गम्भीर असरमा परेको र उपचारका लागि औषधि सेवन गर्नुपरेको समेत उनले बताएकी छन्।

स्रोतका अनुसार जाहेरी दर्ता भएपछि जिल्ला प्रहरी परिसर ललितपुर र बारा प्रहरीबीच समन्वय गरी आरोपीलाई सिमराबाट गत बुधबार पक्राउ गरिएको थियो। उनलाई हवाईमार्गबाट काठमाडौं ल्याई ललितपुर प्रहरीको जिम्मा लगाइएको बताइएको छ।

हाल घटनाबारे थप अनुसन्धान भइरहेको प्रहरीले जनाएको छ। पीडित महिलाको परिचय गोप्य राख्दै जाउलाखेल चालीस उपनाम दिइएको छ भने मुद्दा जिल्ला प्रहरी परिसर ललितपुरमा दर्ता भई कानुनी प्रक्रिया अघि बढिरहेको स्रोतले जनाएको छ।पिडित महिला(जाउलाखेल चालीस)को मुद्दा दर्ता नम्बर १०४२ रहेको बुझिएको छ।

यसैबीच, पीडित महिलाले आफू सामाजिक दृष्टिकोण र घटनाको मानसिक आघातका कारण अत्यन्त पीडामा रहेको बताएकी छन्। उनले जबर्जस्ती करणीजस्तो गम्भीर अपराधलाई मिलापत्र गराउन केही प्रभावशाली व्यक्तिहरूले दबाब दिने प्रयास गरेको आरोपसमेत लगाएकी छन्। यद्यपि, उक्त आरोपबारे सम्बन्धित पक्षको प्रतिक्रिया प्राप्त हुन सकेको छैन।

प्रहरीले घटनासम्बन्धी सबै पक्षको अनुसन्धान गरी कानुनबमोजिम प्रक्रिया अघि बढाइने जनाएको छ।

Facebook Comments Box