कैलालीमा भीषण मोटरसाइकल दुर्घटना: तीन जनाको मृत्यु, एक घाइते

कैलाली जिल्लाको गोदावरी नगरपालिका–४ स्थित वनदेवी मन्दिर नजिक शुक्रबार साँझ भएको भीषण मोटरसाइकल दुर्घटनामा तीन जनाको ज्यान गएको छ भने एक जना घाइते भएका छन्।
प्रहरीका अनुसार, गोदावरीबाट अत्तरियातर्फ आउँदै गरेको सुप प्र ०१–००९ प ७७८१ नम्बरको मोटरसाइकल र विपरीत दिशाबाट गइरहेको ०१–०१० प ३१८७ नम्बरको मोटरसाइकल एकापसमा ठोक्किँदा दुर्घटना भएको हो। साँझको समयमा भएको यो ठक्कर अत्यन्तै शक्तिशाली रहेको जनाइएको छ।
दुर्घटनामा गम्भीर घाइते भएका धनगढी–२ निवासी हरिस ओलीको नवजीवन अस्पतालमा उपचारका क्रममा मृत्यु भएको थियो। त्यस्तै, गोदावरी नगरपालिका–१ का २१ वर्षीय हरिस विक र सोही स्थानका अन्दाजी २५ वर्षीय योगेन्द्र शाहको पनि उपचारकै क्रममा ज्यान गएको इलाका प्रहरी कार्यालय अत्तरियका प्रहरी नायब उपरीक्षक रणबहादुर चन्दले जानकारी दिएका छन्।
दुर्घटनामा परी घाइते भएका गोदावरी–६ का अन्दाजी २३ वर्षीय जीवन पाठकको मायामेट्रो अस्पतालमा उपचार भइरहेको छ। प्रहरीका अनुसार उनको अवस्था मध्यम रहेको छ।
प्रारम्भिक अनुसन्धानअनुसार तीव्र गति र सम्भावित लापरबाही दुर्घटनाको कारण हुन सक्ने आशंका गरिएको छ। घटनाबारे थप अनुसन्धान भइरहेको प्रहरीले जनाएको छ।

Facebook Comments Box