पूर्व प्रहरी अधिकृतहरूको चुनावी भिडन्त : शीर्ष नेतृत्व पराजित, तल्लो तहका अधिकारी विजयी

काठमाडौं । प्रतिनिधि सभा निर्वाचनमा अवकाशप्राप्त प्रहरी अधिकृतहरूको चुनावी प्रतिस्पर्धाले रोचक चित्र प्रस्तुत गरेको छ। प्रहरी संगठनको शीर्ष नेतृत्व सम्हालेका केही पूर्व प्रहरी प्रमुखहरू पराजित भइरहँदा तल्लो तहबाट अवकाश लिएका उम्मेदवार भने उल्लेख्य रूपमा विजयी बन्ने क्रममा देखिएका छन्।
राष्ट्रिय स्वतन्त्र पार्टी (रास्वपा) बाट उम्मेदवार बनेका पूर्व डिएसपी गोविन्द पन्थी गुल्मी–२ बाट निर्वाचित भएका छन्। उनले गोकर्ण बिष्ट लाई पराजित गरेका हुन्। पन्थीले १६ हजार ९६७ मत प्राप्त गर्दा नेकपा एमाले का उपाध्यक्ष बिष्टले १६ हजार ४०६ मत ल्याएका छन्।
यस्तै कपिलवस्तु–२ मा रास्वपाका उम्मेदवार पूर्व एसएसपी विक्रम थापा जितको नजिक पुगेका छन्। हालसम्मको मतगणनाअनुसार थापाले १६ हजार २४६ मत प्राप्त गरेका छन् भने उनका निकटतम प्रतिस्पर्धी एमालेका बृजेश कुमार गुप्ता ले ९ हजार ९१५ मत ल्याएका छन्।
त्यसैगरी झापा–४ बाट रास्वपाका उम्मेदवार बनेका पूर्व सई शम्भुप्रसाद ढकाल को जित पनि लगभग सुनिश्चित देखिएको छ। हालसम्मको मतगणनामा उनले १८ हजार ८११ मत प्राप्त गरेका छन् भने उनका निकटतम प्रतिस्पर्धी लालप्रसाद सावाँ ले ५ हजार ५९० मत मात्र ल्याएका छन्।
यी बाहेक रास्वपाबाटै उम्मेदवार बनेका पूर्व एआईजी विश्वराज पोखरेल भने ओखलढुंगा मा झण्डै एक हजार मतले दोस्रो स्थानमा रहेका छन्।
यसैबीच, पूर्व आईजीपी ध्रुवबहादुर प्रधान नवलपरासी बाट तथा अर्का पूर्व आईजीपी सर्वेन्द्र खनाल बारा क्षेत्रबाट भने पराजित भइसकेका छन्।

Facebook Comments Box