निर्वाचन आयोगको स्पष्ट सन्देश: “मतपेटिका कुनै हालतमा साटिँदैन”

काठमाडौं। निर्वाचन आयोगले मतपेटिका साटिने भन्ने अफवाहहरू पूर्णतः निराधार, भ्रामक र कपोलकल्पित रहेको स्पष्ट पारेको छ। बुधबार आयोजित पत्रकार सम्मेलनमा कार्यवाहक प्रमुख निर्वाचन आयुक्त रामप्रसाद भण्डारीले मतपेटिकाको सुरक्षामा कुनै सम्झौता नहुने दृढ अडान दोहोर्याए।
भण्डारीले सामाजिक सञ्जाल तथा विभिन्न माध्यममा फैलाइएका “हेलिकोप्टरमार्फत ढुवानी गर्दा मतपेटिका नै परिवर्तन हुन्छ” भन्ने हल्ला असत्य भएको उल्लेख गर्दै भने, “कतिपय ठाउँमा हेलिकोप्टरमा मतपेटिका हालेपछि साटिन्छ भन्ने सुनेको छु, त्यो किञ्चित होइन—कुनै हालतमा हुँदैन।”
उनका अनुसार मतगणना सुरु हुनुअघि दलका प्रतिनिधिहरूले आफ्नै लाहाछाप (सील) ठीक अवस्थामा छ कि छैन भनी परीक्षण गरेर मुचुल्का तयार गरेपछि मात्रै मतगणना प्रक्रिया अगाडि बढाइन्छ। यसले पारदर्शिता र विश्वसनीयता सुनिश्चित गर्ने आयोगको दाबी छ।
तीन तहको कडा सुरक्षा घेरा
मतदान सम्पन्न भएपछि मतपेटिका परम्परागत र बहु-स्तरीय सुरक्षा व्यवस्थाअन्तर्गत सुरक्षित राखिने आयोगले जनाएको छ।
बाहिरी घेरा: नेपाली सेना
मध्य घेरा: सशस्त्र प्रहरी बल
भित्री घेरा: नेपाल प्रहरी
यस त्रिस्तरीय सुरक्षाबीच मतपेटिका सुरक्षित राखिने र ढुवानी गरिने भण्डारीले स्पष्ट पारे।
दुर्गम क्षेत्रका लागि सेनाको हेलिकोप्टर
दुर्गम तथा पहुँच कठिन क्षेत्रबाट मतपेटिका सुरक्षित रूपमा संकलन गर्न नेपाली सेनाको भरपर्दो हेलिकोप्टर प्रयोग गरिने आयोगले जानकारी दिएको छ। सेनाले “छुट्टै मतपेटिका ल्याउने” भन्ने हल्ला निराधार भएको भन्दै आयोगले आम नागरिक, राजनीतिक दल र सरोकारवालालाई भ्रममा नपर्न आग्रह गरेको छ।
निर्वाचन प्रक्रियालाई स्वच्छ, निष्पक्ष र पारदर्शी बनाउन आयोग पूर्ण प्रतिबद्ध रहेको दोहोर्याउँदै भण्डारीले सत्यतथ्यमा आधारित सूचना मात्रै विश्वास गर्न सबैमा अपिल गरेका छन्।

Facebook Comments Box