झापामा विद्यार्थी बोकेको बस दुर्घटना : १३ जना घाइते, चालक फरार

झापा । झापाको कचनकबल गाउँपालिका–३ मा विद्यार्थी बोकेको बस दुर्घटना हुँदा १३ जना घाइते भएका छन्।

विद्यार्थी ओसारिरहेको विद्यापानी माध्यमिक विद्यालयको प्र१–०१–००१ ख ४४८२ नम्बरको बस दुर्घटनामा परेको हो। दुर्गाभिट्टाबाट आमबारीतर्फ जाँदै गरेको उक्त बसले प्र१–०१–०१३ प ३४८२ नम्बरको मोटरसाइकललाई ठक्कर दिँदा अनियन्त्रित भई सडकमा पल्टिएको जिल्ला प्रहरी कार्यालय झापाले जनाएको छ।

दुर्घटनाका बेला बसमा सवार १८ जनामध्ये १३ विद्यार्थी घाइते भएका छन्। घाइतेमध्ये ११ जनालाई उपचारका लागि बिर्तामोडस्थित मनमोहन सामुदायिक अस्पतालमा भर्ना गरिएको प्रहरीले जानकारी दिएको छ।

मोटरसाइकल चालक कचनकबल–३ निवासी ५२ वर्षीय ओमप्रसाद तिम्सिनाको मुख, टाउको र खुट्टामा चोट लागेको छ।

दुर्घटनापछि बस चालक फरार रहेका छन् भने प्रहरीले उनको खोजी कार्य तीव्र पारेको जनाएको छ।

Facebook Comments Box