सल्यान प्रहरी कार्यालय परिसरमा ८६ वटा बम बरामद, सेनाको बम डिस्पोजल टोली परिचालन

सल्यान । जिल्ला प्रहरी कार्यालय सल्यानको परिसरभित्र ठूलो संख्यामा बम बरामद भएको छ।

प्रहरी कार्यालयको नयाँ भवन निर्माणका लागि जग खन्ने क्रममा जमिनमुनि लुकाइएका ८६ वटा बम फेला परेको हो। शारदा नगरपालिका–३ स्थित उक्त क्षेत्रमा प्रारम्भमा शंकास्पद वस्तु देखिएपछि बुधबारदेखि उत्खनन सुरु गरिएको थियो।

उत्खननका क्रममा शनिबार बिहान ११:२० बजेसम्म कुल ८६ वटा बम फेला परेको जिल्ला प्रहरी कार्यालय सल्यानले जनाएको छ। बरामद गरिएका बममध्ये ८२ वटा सकेट बम, ३ वटा सुतली बम र १ वटा बोतल बम रहेका छन्।

यसै क्रममा ७ थान रेडियो वेभ उपकरण, करिब ५०० ग्राम विस्फोटक पदार्थ, झण्डै २ केजी बम बनाउन प्रयोग हुने सामग्री तथा १० मिटर फायरिङ केबल समेत बरामद भएको प्रहरीले जनाएको छ।

घटनापछि जिल्ला प्रहरी कार्यालय सल्यानमा उच्च सतर्कता अपनाइएको छ। प्रारम्भिक अनुसन्धानपछि नेपाली सेनासँग समन्वय गरी थप जनशक्ति परिचालन गरिएको छ।

दाङस्थित नं. १९ बाहिनीबाट बम डिस्पोजल टोली बोलाइएको छ भने शनिबार बिहानदेखि विभिन्न गणका इन्जिनियर टोली घटनास्थलमा खटिएका छन्। उनीहरूले फेला परेका बमहरूलाई सुरक्षित रूपमा निष्क्रिय पार्ने तयारी गरिरहेका छन्।

घटनाबारे थप अनुसन्धान जारी रहेको प्रहरीले जनाएको छ।

Facebook Comments Box