रास्वपा सांसदकै घर ऐलानी जग्गामा, नक्सापाससमेत छैन

कैलाली । सार्वजनिक तथा अतिक्रमित जग्गामा बनेका संरचनाविरुद्ध सरकार आक्रामक रूपमा प्रस्तुत भइरहेका बेला सत्तारूढ दलकै एक सांसदको घर सम्बन्धी तथ्य बाहिरिएको छ। राष्ट्रिय स्वतन्त्र पार्टी (रास्वपा) का सांसद केपी खनालको निर्माणाधीन घर सार्वजनिक ऐलानी जग्गामा रहेको र त्यसको नक्सापाससमेत नभएको पाइएको हो।

कैलालीको लम्की चुहा नगरपालिका–१ स्थित बसपार्क नजिक निर्माण भइरहेको उक्त घर लालपूर्जा नभएको जग्गामा ठड्याइएको स्थानीय स्रोतले जनाएका छन्। साथै, नगरपालिकाबाट आवश्यक नक्सापास प्रक्रिया समेत पूरा नगरिएको खुलासा भएको छ।

प्रधानमन्त्री बालेन्द्र शाह नेतृत्वको सरकारले सार्वजनिक जग्गा अतिक्रमण गरी बनाइएका तथा नक्सापास बिना निर्माण गरिएका संरचनामाथि कारबाही तीव्र बनाइरहेका बेला आफ्नै दलका सांसदको घरबारे यस्तो तथ्य सार्वजनिक हुनु राजनीतिक रूपमा अर्थपूर्ण मानिएको छ।

सरकारले देशभर अतिक्रमण हटाउने अभियान सञ्चालन गरिरहेको सन्दर्भमा समान मापदण्ड लागू हुने कि नहुने भन्ने प्रश्न समेत उठ्न थालेको छ। कानुन सबैका लागि बराबर हुनुपर्ने माग गर्दै स्थानीयले सम्बन्धित निकायको ध्यानाकर्षण गराएका छन्।

यस विषयमा सांसद खनालको आधिकारिक प्रतिक्रिया आउन बाँकी रहेको छ भने सम्बन्धित निकायले समेत औपचारिक धारणा सार्वजनिक गरेका छैनन्।

Facebook Comments Box