मालपोत कार्यालयको नाम परिवर्तन गरी ‘भूमि प्रशासन कार्यालय’ कायम

काठमाडौं । सरकारले मालपोत कार्यालयको नाम परिवर्तन गरी अबदेखि ‘भूमि प्रशासन कार्यालय’ कायम गर्ने व्यवस्था गरेको छ।

मालपोत ऐन तथा जग्गा (नाप जाँच) ऐनमा रहेको ‘मालपोत कार्यालय’ भन्ने शब्द हटाएर त्यसको सट्टा ‘भूमि प्रशासन कार्यालय’ उल्लेख गरिएको छ। सरकारले केही नेपाल ऐन संशोधन गर्न बनेको अध्यादेशमार्फत उक्त व्यवस्था लागू गरेको हो।

संशोधित व्यवस्थाअनुसार मालपोत अधिकृतलाई पनि अबदेखि ‘भूमि प्रशासन अधिकृत’ भनेर सम्बोधन गरिनेछ। सरकारले प्रशासनिक संरचनालाई आधुनिक र एकीकृत बनाउन यो परिवर्तन गरिएको जनाएको छ।

यससँगै भूमि व्यवस्थापन र अभिलेख प्रणालीलाई थप व्यवस्थित, प्रभावकारी र सेवाग्राहीमैत्री बनाउने उद्देश्य राखिएको बताइएको छ।

Facebook Comments Box