आईजीपी कार्कीको निर्देशन: प्रहरी सेवा ‘जीवनशैली’का रूपमा आत्मसात् गरिनुपर्छ

कोहलपुर । नेपाल प्रहरीले प्रदान गर्दै आएको सेवालाई अझै नागरिकमैत्री, प्रभावकारी र गुणस्तरीय बनाउन प्रहरी महानिरीक्षक (आईजीपी) दानबहादुर कार्कीले सम्पूर्ण प्रहरी कर्मचारीलाई स्पष्ट र कडा निर्देशन दिएका छन्। उनले प्रहरी सेवालाई केवल औपचारिक जिम्मेवारीका रूपमा नभई अनुशासन, निष्ठा र सेवाभावले निर्देशित जीवनशैलीका रूपमा आत्मसात् गर्नुपर्नेमा जोड दिए।
बुधबार बाँकेको इलाका प्रहरी कार्यालय, कोहलपुरमा आयोजित महिला, बालबालिका तथा ज्येष्ठ नागरिक सेवा केन्द्रको नवनिर्मित भवन शुभारम्भ समारोहलाई सम्बोधन गर्दै आईजीपी कार्कीले प्रहरी संगठन जनताको भरोसाको केन्द्र बन्नुपर्ने बताए। उनले नागरिकको सेवा र सुरक्षालाई केन्द्रमा राख्दै अनुशासित, व्यावसायिक र उच्च नैतिक मापदण्डमा आधारित कार्यसम्पादन गर्न प्रहरी जनशक्तिलाई आग्रह गरे।
कार्यक्रममा बोल्दै उनले भने,
“प्रहरी सेवा केवल एउटा जागिर होइन, यो जीवनशैली हो। सत्य, निष्ठा, सेवाभाव र सुरक्षाको प्रत्याभूत गर्न निरन्तर जोस, जाँगर र प्रतिबद्धता आवश्यक पर्छ। राज्यका प्रतिनिधिका रूपमा प्रहरी गाउँ–गाउँसम्म प्रभावकारी रूपमा पुग्न सधैं सक्रिय हुनुपर्छ।”
आईजीपी कार्कीले विशेष गरी महिला, बालबालिका तथा ज्येष्ठ नागरिकमाथि हुने हिंसालाई गम्भीर र संवेदनशील विषयका रूपमा लिन निर्देशन दिए। उनले पीडितलाई सेवा प्रदान गर्दा गोपनीयता, सम्मान र विश्वास कायम हुने पीडितमैत्री प्रणाली विकास गरिने विश्वास व्यक्त गरे।
उनका अनुसार सेवा केन्द्रलाई केवल उजुरी दर्ताको स्थानमा सीमित नराखी मनोवैज्ञानिक, सामाजिक र कानुनी संरक्षणको आधार केन्द्रका रूपमा विकास गरिनेछ। यसका लागि सम्बन्धित सरकारी तथा गैरसरकारी निकायसँग सहकार्य गर्दै सेवा प्रवाहलाई अझ प्रभावकारी बनाइने उनले बताए।
कार्यक्रममा सहभागी स्थानीय जनप्रतिनिधि तथा प्रहरी अधिकारीहरूले नवनिर्मित भवन सञ्चालनमा आएपछि हिंसामा परेका महिला, बालबालिका तथा ज्येष्ठ नागरिकले सुरक्षित, सहज र सम्मानजनक वातावरणमा सेवा प्राप्त गर्ने विश्वास व्यक्त गरे। यस्तो संरचनाले प्रहरी–नागरिक सम्बन्ध थप सुदृढ बनाउने उनीहरूको धारणा थियो।
नेपाल प्रहरीले पछिल्ला वर्षहरूमा सेवा केन्द्रहरूको विस्तार, प्रविधिको प्रयोग र जनमैत्री प्रहरी अवधारणालाई सशक्त रूपमा अघि बढाउँदै आएको छ। आईजीपी कार्कीको स्पष्ट निर्देशनसँगै आगामी दिनमा प्रहरी सेवाको गुणस्तर, विश्वास र प्रभावकारिता अझ उचाइमा पुग्ने अपेक्षा गरिएको छ।

Facebook Comments Box