मधेशमा बढ्दो सुरक्षा चुनौती: एआइजी उमाप्रसाद चतुर्वेदीलाई समन्वयको महत्वपूर्ण जिम्मेवारी

काठमाडौं — पछिल्लो समय मधेश प्रदेशमा देखिएको सुरक्षा संवेदनशीलतालाई ध्यानमा राख्दै केन्द्रीय सुरक्षा समितिले गम्भीर समीक्षा गरेको छ। शनिबार बसेको समितिको बैठकले मधेशमा सुरक्षा चुनौती बढ्दै गएको निष्कर्ष निकाल्दै त्यसको प्रभावकारी व्यवस्थापनका लागि विशेष कदम चाल्ने निर्णय गरेको हो।
गृह मन्त्रालयले सोही निर्णयअनुसार नेपाल प्रहरीका एआइजी उमाप्रसाद चतुर्वेदी लाई मधेशमा समन्वयको जिम्मेवारीसहित खटाउने निर्णय गरेको छ। आगामी निर्वाचन अवधिभर उनी सुरक्षा निकायहरूबीच उच्चस्तरीय समन्वय कायम गर्ने, संवेदनशील क्षेत्रहरूको नियमित अनुगमन गर्ने तथा आवश्यक सूचना संकलन गरी परिस्थितिअनुसार रणनीति निर्माण गरेर कार्यान्वयन गर्ने जिम्मेवारीमा रहनेछन्।
चतुर्वेदी मधेशको भौगोलिक, सामाजिक तथा राजनीतिक परिवेशसँग परिचित सुरक्षा अधिकारीका रूपमा चिनिन्छन्। यसअघि विभिन्न महत्वपूर्ण जिम्मेवारी सफलतापूर्वक सम्हालेका उनले स्थानीय तहसम्मको सुरक्षात्मक संरचनासँग सहकार्य गर्दै प्रभावकारी सुरक्षा व्यवस्थापन गर्ने अपेक्षा गरिएको छ।
निर्वाचन नजिकिँदै गर्दा सुरक्षा चुनौतीहरूलाई समयमै सम्बोधन गर्न सरकार सचेत देखिएको छ। विशेषगरी सीमावर्ती क्षेत्र, भीडभाड हुने स्थान तथा संवेदनशील मतदान केन्द्रहरूमा निगरानी बढाइने जनाइएको छ। सुरक्षा संयन्त्रहरूबीच सूचनाको आदानप्रदान तीव्र बनाइने र आवश्यक परे थप सुरक्षाकर्मी परिचालन गरिने तयारी छ।
सरकारको यो कदमले मधेशमा शान्ति, स्थिरता र निष्पक्ष निर्वाचन वातावरण सुनिश्चित गर्न महत्वपूर्ण भूमिका खेल्ने विश्वास गरिएको छ।

Facebook Comments Box