जेनजी आन्दोलनमा भ्रामक सूचना: पाँच इन्फ्लुएन्सर दोषी ठहर

काठमाडौं । जेनजी आन्दोलनका क्रममा सामाजिक सञ्जालमार्फत व्यापक रूपमा भ्रामक सूचना फैलिएको ठहरसहित जाँचबुझ आयोगको प्रतिवेदन सार्वजनिक भएको छ ।

आयोगले पाँच जना सामाजिक सञ्जाल इन्फ्लुएन्सर—टंक दाहाल, सुजन ढकाल, शिव परियार, हिमेश पन्त र भाग्य न्यौपाने—लाई गलत सूचना प्रवाहमा संलग्न ठहर गरेको छ । प्रतिवेदनअनुसार उनीहरूले आन्दोलनका दिनहरूमा अपुष्ट, भ्रामक तथा उत्तेजना फैलाउने सामग्री प्रसारण गरेका थिए, जसले जनआक्रोश बढाउन र परिस्थिति थप तनावग्रस्त बनाउन भूमिका खेलेको उल्लेख गरिएको छ ।

विशेषगरी, चैत २३ गते चुच्चेपाटीस्थित भाटभटेनी सुपरमार्केटमा ३५ शव भेटिएको भन्ने झुटो दाबी सामाजिक सञ्जालमा व्यापक रूपमा फैलाइएको थियो । त्यस्तै, चैत २४ गते बानेश्वरस्थित संसद भवनभित्र ३२ जना हराइरहेका प्रदर्शनकारी मृत अवस्थामा फेला परेको भन्ने प्रचारसमेत पूर्ण रूपमा निराधार रहेको आयोगले निष्कर्ष निकालेको छ ।

यसैबीच, एक विमान परिचारिकाले हिमालयन एयरलाइन्सको जहाजमार्फत तत्कालीन प्रधानमन्त्री केपी शर्मा ओली दुबई भागेको भन्ने व्यक्तिगत अनुभवको हवाला दिँदै फैलाएको सूचना पनि भ्रामक रहेको प्रतिवेदनमा उल्लेख गरिएको छ ।

आयोगले यस्ता गलत सूचनाले सामाजिक सद्भाव खल्बल्याउनुका साथै सुरक्षास्थितिमा प्रत्यक्ष असर पार्ने भएकाले जिम्मेवार सञ्चार व्यवहारको आवश्यकता औंल्याएको छ ।

Facebook Comments Box