बिरामीहरूलाई फलफूल वितरण गर्दै प्रहरी श्रीमती संघद्वारा मानवीय सेवा, अस्पताललाई टिभी र ईसिजी मेसिन हस्तान्तरण

काठमाडौं । नेपाल प्रहरी अस्पतालको ४२औँ वार्षिकोत्सवको अवसरमा नेपाल प्रहरी श्रीमती संघले उपचाररत बिरामीहरूलाई फलफूल वितरण गर्दै मानवीय सेवा र सहकार्यको उत्कृष्ट उदाहरण प्रस्तुत गरेको छ।

कार्यक्रममा संघकी अध्यक्ष नविना कार्कीको नेतृत्वमा अस्पतालका विभिन्न वार्डमा पुगेर बिरामीहरूको स्वास्थ्य अवस्थाबारे जानकारी लिँदै उनीहरूलाई फलफूल वितरण गरिएको थियो। बिरामीहरूको मनोबल उच्च बनाउने उद्देश्यले गरिएको उक्त पहललाई सहभागीहरूले सराहनीय कार्यका रूपमा लिएका छन्।

सोही अवसरमा संघले अस्पताललाई थप सेवा सुदृढ बनाउन सहयोगस्वरूप टिभी र ईसिजी मेसिन हस्तान्तरण गरेको छ। उक्त उपकरणहरू संघकी अध्यक्ष कार्कीले अस्पतालका प्राविधिक प्रहरी वरिष्ठ उपरीक्षक भीम कुमारी पाण्डेलाई हस्तान्तरण गर्नुभयो।

नेपाल प्रहरी श्रीमती संघका पदाधिकारीहरूको सक्रिय सहभागितामा सम्पन्न कार्यक्रममा सामाजिक उत्तरदायित्वप्रति संस्थाको प्रतिबद्धता झल्किएको छ। यस्तो मानवीय कार्यले बिरामीहरूमा सकारात्मक ऊर्जा थप्नुका साथै सेवामुखी कार्यमा संघको भूमिका अझ सशक्त बन्दै गएको देखिएको छ।

Facebook Comments Box