ओली–प्रचण्ड भेट : संवादले देखायो सहकार्य र स्थिरताको संकेत

काठमाडौं । महेश बस्नेतले केपी शर्मा ओली र पुष्पकमल दाहाल प्रचण्डबीच हालै भएको भेटवार्तालाई राष्ट्रिय राजनीतिका लागि सकारात्मक संकेतका रूपमा व्याख्या गरेका छन्।

बिहीबार त्रिभुवन विश्वविद्यालय शिक्षण अस्पतालमा उपचाररत एमाले अध्यक्ष ओलीलाई भेट्न पूर्वप्रधानमन्त्री दाहाल पुगेका थिए। करिब ४० मिनेटसम्म चलेको उक्त भेटलाई सामान्य स्वास्थ्य अवस्थाबारे चासोका रूपमा हेरिए पनि ओली निकट नेता बस्नेतले यसलाई गहिरो राजनीतिक सन्देश बोकेको बताएका छन्।

सामाजिक सञ्जालमार्फत प्रतिक्रिया दिँदै बस्नेतले दुई शीर्ष नेताबीचको संवादलाई “सुखद र सन्देशमूलक” भन्दै स्वागत गरेका छन्। उनका अनुसार राजनीतिक मतभेद स्वाभाविक भए पनि राष्ट्रिय हितका लागि संवाद र सहकार्य अपरिहार्य हुन्छ भन्ने सन्देश यस भेटले पुनः स्थापित गरेको छ।

‘पूर्वप्रधानमन्त्री तथा एमाले अध्यक्ष केपी शर्मा ओली र पूर्वप्रधानमन्त्री तथा नेकपा संयोजक प्रचण्डबीच शिक्षण अस्पतालमा भएको भेटले देशको राजनीतिमा सकारात्मक सन्देश दिएको छ,’ बस्नेतले लेखेका छन्, ‘राजनीतिक मतभेद भए पनि राष्ट्रिय हित र सहकार्यका लागि संवाद आवश्यक हुन्छ भन्ने कुरा यो भेटले पुनः पुष्टि गरेको छ।’

बस्नेतले यस्ता भेटघाटले राजनीतिक स्थिरता, सहकार्य र सम्भावित एकताको आधार निर्माण गर्न सहयोग पुग्ने विश्वाससमेत व्यक्त गरेका छन्। उनका अनुसार शीर्ष नेताहरूबीचको संवादले आगामी राजनीतिक समीकरण र सहकार्यको दिशातर्फ नयाँ संकेत दिन सक्छ।

Facebook Comments Box