पश्चिमी वायुको प्रभाव : देशभर बदली, धेरै प्रदेशमा चट्याङसहित वर्षा र हावाहुरीको सम्भावना

काठमाडौँ । नेपालमा अहिले पश्चिमी वायु, स्थानीय वायु तथा पूर्वी भूभाग नजिक बनेको न्यून चापीय क्षेत्रको प्रभाव सक्रिय रहेकाले देशका विभिन्न स्थानमा वर्षा र हावाहुरीको अवस्था देखिएको छ। मौसम पूर्वानुमान महाशाखाका अनुसार हाल हिमाली तथा पहाडी भूभागमा सामान्यदेखि पूर्ण बदली रहेको छ भने तराईका अधिकांश क्षेत्रमा आंशिक बदली रहेको छ।

अहिले कोशी प्रदेशका केही स्थानसहित बागमती, गण्डकी, कर्णाली र सुदूरपश्चिम प्रदेशका थोरै स्थानमा चट्याङसहित मध्यम वर्षा भइरहेको छ। मौसमविद्हरूले दिनभर मौसम थप सक्रिय रहने सम्भावना औँल्याएका छन्।

महाशाखाका अनुसार आज दिउँसो देशभर सामान्य बदली रहनेछ। विशेषगरी गण्डकी, लुम्बिनी, कर्णाली र सुदूरपश्चिम प्रदेशका केही स्थानमा चट्याङसहित मध्यम वर्षाको सम्भावना रहेको छ। साथै कोशी, बागमती र मधेस प्रदेशका तराई भूभागका एक–दुई स्थानमा पनि वर्षा हुन सक्ने जनाइएको छ।

मौसम प्रणालीको प्रभावका कारण सुदूरपश्चिम, कर्णाली र लुम्बिनी प्रदेशका तराई तथा पहाडी क्षेत्रमा हावाहुरी चल्ने सम्भावना रहेकाले सतर्कता अपनाउन आग्रह गरिएको छ।

आज राति पनि लुम्बिनी, सुदूरपश्चिम, कर्णाली, बागमती, गण्डकी र कोशी प्रदेशका हिमाली तथा पहाडी भूभागमा सामान्य बदली कायम रहने मौसम पूर्वानुमान गरिएको छ। त्यस्तै मधेससहित कोशी, बागमती र गण्डकी प्रदेशका तराई क्षेत्रका केही स्थानमा चट्याङसहित वर्षा हुन सक्ने सम्भावना रहेको छ।

मौसमविद्हरूले चट्याङ, हावाहुरी तथा वर्षाका कारण दैनिक जनजीवन, कृषि, सडक तथा हवाई यातायातमा आंशिक प्रभाव पर्न सक्ने भएकाले आवश्यक सतर्कता अपनाउन सर्वसाधारणलाई आग्रह गरेका छन्।

Facebook Comments Box