फागुन २१ को निर्वाचन लक्षित विशेष सुरक्षा योजना: नेपाल प्रहरीद्वारा ‘विश्लेषण महाशाखा’ गठन

काठमाडौं । आगामी फागुन २१ गते हुने प्रतिनिधिसभा सदस्य निर्वाचनलाई सुरक्षित, शान्तिपूर्ण र विश्वसनीय रूपमा सम्पन्न गराउन नेपाल प्रहरी ले विशेष सुरक्षा रणनीति सार्वजनिक गरेको छ। निर्वाचन बिथोल्ने सम्भावित गतिविधि पहिचान, विश्लेषण र नियन्त्रणका लागि प्रहरी प्रधान कार्यालयले ‘विश्लेषण महाशाखा’ गठन गरेको हो।
प्रहरीको कार्य विभागअन्तर्गत सञ्चालन हुने उक्त महाशाखाको कमाण्ड प्रहरी वरिष्ठ उपरीक्षक (एसएसपी) दयानिधि ज्ञवालीले सम्हाल्नेछन्। महाशाखाले निर्वाचन लक्षित अवाञ्छित गतिविधि, संगठित समूहहरूको चलखेल, सामाजिक सञ्जालमार्फत फैलिन सक्ने दुष्प्रचार तथा सम्भावित सुरक्षा जोखिमको सूक्ष्म अध्ययन गर्नेछ। विश्लेषणबाट प्राप्त निष्कर्षका आधारमा सुरक्षा रणनीति परिमार्जन तथा सुरक्षाकर्मी परिचालन गरिने जनाइएको छ।
प्रहरी प्रधान कार्यालयका एक उच्च अधिकारीका अनुसार, “निर्वाचन बिथोल्ने उद्देश्यले सक्रिय समूहहरूको गतिविधि पहिचान, जोखिम मूल्याङ्कन र आवश्यक प्रतिकारात्मक रणनीति निर्माण गर्ने जिम्मेवारी विश्लेषण महाशाखालाई दिइएको छ।” उनले सुरक्षा चुनौतीको पूर्वानुमान गर्दै ‘प्रो–एक्टिभ’ ढंगले सुरक्षा व्यवस्था मिलाइने बताए।
प्रहरी विश्लेषणअनुसार राष्ट्र, राष्ट्रियता, धर्म, संस्कृति र नागरिक बचाउ महाअभियान का संयोजक दुर्गा प्रसाईं सहित कम्तीमा छ वटा समूह निर्वाचन प्रभावित पार्ने गतिविधिमा सक्रिय देखिएका छन्। प्रसाईं हाल जिल्ला प्रहरी परिसर काठमाडौं को हिरासतमा रहेका छन्।
सम्भावित अस्थिरता, अवरोध र उत्तेजनात्मक गतिविधिलाई समयमै नियन्त्रणमा लिन निगरानी प्रणाली सुदृढ पारिएको प्रहरीले जनाएको छ। मतदान केन्द्र तथा संवेदनशील क्षेत्रहरूमा सुरक्षा संयन्त्र उच्च सतर्कतामा राखिएको छ भने आवश्यक परे थप जनशक्ति परिचालन गरिने तयारी छ।
निर्वाचन नजिकिँदै जाँदा सुरक्षा व्यवस्थालाई थप प्रभावकारी, प्रविधिमैत्री र सूचनामा आधारित बनाउँदै लैजाने रणनीति प्रहरीले अघि सारेको छ। शान्तिपूर्ण र व्यवस्थित मतदान वातावरण सुनिश्चित गर्न सबै पक्षसँग समन्वयलाई समेत प्राथमिकतामा राखिएको प्रहरीको भनाइ छ।

Facebook Comments Box