“निर्वाचन सुरक्षामा खटिएका ३४ हजार सशस्त्र प्रहरीलाई आइजीपी अर्यालको धन्यवाद: अनुशासन र तटस्थताले जोगायो लोकतन्त्र”

काठमाडौं। गत फागुन २१ गते सम्पन्न प्रतिनिधिसभा सदस्य निर्वाचनलाई शान्तिपूर्ण, सुरक्षित र भयरहित वातावरणमा सम्पन्न गराउन भूमिका खेलेका सशस्त्र प्रहरी बल नेपालका ३४ हजारभन्दा बढी सुरक्षाकर्मीलाई महानिरीक्षक (आइजीपी) राजु अर्यालले धन्यवाद दिएका छन्।
सोमबार सशस्त्र प्रहरी बल नेपालको प्रधान कार्यालयमा आयोजित विशेष कार्यक्रममा आइजीपी अर्यालले निर्वाचन सुरक्षामा खटिएका सम्पूर्ण सशस्त्र प्रहरी कर्मचारीको अनुशासन, व्यावसायिकता र तटस्थताले लोकतान्त्रिक प्रक्रियालाई सुरक्षित बनाउन महत्वपूर्ण योगदान दिएको बताए।
कार्यक्रममा विभागीय प्रमुखहरू, निर्वाचन अनुगमनमा परिचालित वरिष्ठ उपरीक्षक (एसएसपी) तथा उपरीक्षक (एसपी)हरू प्रत्यक्ष सहभागी थिए भने देशभरका विभिन्न प्रदेशबाट बाहिनीपति, कार्यालय प्रमुख तथा अन्य प्रहरी कर्मचारीहरू भर्चुअल माध्यममार्फत जोडिएका थिए।
आइजीपी अर्यालले सशस्त्र प्रहरी संगठन अनुशासन, इमानदारिता र राष्ट्रप्रतिको समर्पणलाई मूल मूल्यका रूपमा आत्मसात गर्दै अघि बढिरहेको उल्लेख गर्दै लोकतान्त्रिक अभ्यासलाई सुरक्षित राख्न सुरक्षाकर्मीको भूमिका अत्यन्त महत्वपूर्ण हुने बताए।
उनले भने, “निर्वाचन जस्तो संवेदनशील समयमा सुरक्षा व्यवस्थापन गर्नु सजिलो काम होइन। तर सशस्त्र प्रहरीका कर्मचारीहरूले उच्च अनुशासन, व्यावसायिकता र राष्ट्रप्रतिको समर्पणका साथ आफ्नो कर्तव्य निर्वाह गरेका छन्।”
उनका अनुसार निर्वाचन अवधिमा देशभर विभिन्न सम्भावित जोखिम र चुनौतीहरू रहे पनि सुरक्षाकर्मीहरूको सक्रियता, समन्वय र सतर्कताका कारण कुनै ठूलो अप्रिय घटना हुन पाएन। यसले सशस्त्र प्रहरी कर्मचारीहरूको क्षमता, दक्षता र जिम्मेवारीप्रतिको प्रतिबद्धता थप प्रमाणित गरेको उनले बताए।
कार्यक्रमका क्रममा आइजीपी अर्यालले संगठनभित्र कार्यरत सबै दर्जाका कर्मचारीलाई आचारसंहिता विपरीत कुनै पनि गतिविधिमा संलग्न नहुन कडा निर्देशन पनि दिएका थिए। संगठनको प्रतिष्ठा कायम राख्न अनुशासन र नैतिकता अत्यन्त महत्वपूर्ण हुने उल्लेख गर्दै उनले सुरक्षाकर्मीका लागि तटस्थता पहिलो दायित्व भएको बताए।
“सशस्त्र प्रहरी बल राज्यको सुरक्षा प्रणालीको महत्वपूर्ण अंग हो। त्यसैले संगठनको तटस्थ छवि कायम राख्नु हामी सबैको जिम्मेवारी हो,” उनले भने।
त्यस्तै उनले सीमा क्षेत्रमा परिचालित सुरक्षाकर्मीहरूलाई सम्बन्धित सरकारी निकाय तथा समकक्षी सुरक्षा निकायसँग समन्वय गरेर काम गर्न निर्देशन दिए। सीमावर्ती क्षेत्रमा हुने गतिविधि तथा सम्भावित सुरक्षा चुनौतीलाई ध्यानमा राख्दै सूचनाको आदान–प्रदान र संयुक्त समन्वयलाई थप प्रभावकारी बनाउनुपर्ने उनले बताए।
प्रतिनिधिसभा सदस्य निर्वाचनको सुरक्षा व्यवस्थापनका लागि सरकारद्वारा ठूलो संख्यामा सुरक्षाकर्मी परिचालन गरिएको थियो। निर्वाचन सुरक्षामा देशभर ३४ हजार ५७६ जना सशस्त्र प्रहरी परिचालन भएका थिए।
यसैगरी नेपाल प्रहरीका ७५ हजार ७९७, नेपाली सेनाका ७९ हजार ७२७ तथा राष्ट्रिय अनुसन्धान विभागका १ हजार ९२१ सुरक्षाकर्मी पनि निर्वाचन सुरक्षामा खटिएका थिए। यसबाहेक १ लाख ४९ हजार ९० जना अस्थायी निर्वाचन प्रहरी समेत परिचालन गरिएको थियो।
निर्वाचन जस्तो राष्ट्रिय महत्वको प्रक्रियालाई सुरक्षित बनाउन बहुस्तरीय सुरक्षा व्यवस्था गरिएको थियो। मतदान केन्द्र, मतपेटिका ढुवानी, मतगणना स्थलको सुरक्षा तथा सम्भावित संवेदनशील क्षेत्रको निगरानीका लागि सुरक्षाकर्मीहरू चौबीसै घण्टा परिचालित भएका थिए।
सुरक्षा निकायका अनुसार यसपटकको निर्वाचनमा चार तहको सुरक्षा घेरा बनाइएको थियो। पहिलो घेरामा अस्थायी निर्वाचन प्रहरी, दोस्रोमा नेपाल प्रहरी, तेस्रोमा सशस्त्र प्रहरी र चौथो घेरामा नेपाली सेना परिचालन गरिएको थियो।
विशेषगरी दुर्गम तथा संवेदनशील क्षेत्रहरूमा हेलिकोप्टरमार्फत सुरक्षाकर्मी तथा निर्वाचन सामग्री ढुवानी गरिएको थियो भने सीमा नाका तथा संवेदनशील क्षेत्रमा विशेष निगरानी समेत बढाइएको थियो।
निर्वाचन आयोगका अनुसार सुरक्षाकर्मीहरूको प्रभावकारी परिचालनका कारण देशभर मतदान प्रक्रिया अधिकांश स्थानमा शान्तिपूर्ण रूपमा सम्पन्न भएको थियो।
आइजीपी अर्यालले आगामी दिनमा पनि यस्तै जिम्मेवारीपूर्ण भूमिका निर्वाह गर्न संगठनका सबै कर्मचारीलाई प्रेरित गर्दै राष्ट्र र नागरिकको सुरक्षाका लागि सशस्त्र प्रहरी बल सधैँ तत्पर रहने विश्वास व्यक्त गरे।