प्रहरी सुधारको अभियानमा गृहमन्त्री गुरुङ — व्यवहारदेखि प्रविधिसम्म व्यापक रूपान्तरणको संकेत

काठमाडौँ — गृहमन्त्री सुधन गुरुङले प्रहरी संगठनलाई आधुनिक, जिम्मेवार र जनमैत्री बनाउने स्पष्ट लक्ष्यसहित सुधारको संकेत दिएका छन्। सोमबार प्रहरी प्रधान कार्यालय, नक्सालको निरीक्षण गर्दै उनले प्रहरीको कार्यशैलीमा गुणात्मक परिवर्तन आवश्यक रहेको औंल्याए।

डिजिटल फरेन्सिक ल्याब, अपराध अनुसन्धान विभाग लगायत विभिन्न निकायको अवलोकनपछि उच्च प्रहरी अधिकृतहरूलाई सम्बोधन गर्दै उनले सर्वसाधारणसँगको बोली र व्यवहार सुधार्न विशेष निर्देशन दिए। “प्रहरीलाई जनताको भरोसायोग्य मोडल संस्थाका रूपमा विकास गर्नु हाम्रो लक्ष्य हो,” उनले भने।

गृहमन्त्री गुरुङले प्रहरीको आधारभूत सुविधादेखि अनुसन्धान प्रणालीसम्म व्यापक सुधार आवश्यक रहेको उल्लेख गरे। रासन व्यवस्थापन सुधार, अत्याधुनिक प्रविधिको प्रयोगमार्फत अनुसन्धान क्षमतामा वृद्धि तथा कार्यक्षमता अभिवृद्धि गर्न सरकार प्रतिबद्ध रहेको उनको भनाइ थियो। “हामी आवश्यक स्रोतसाधन उपलब्ध गराउँछौँ, तपाईंहरू परिणाम देखाउनुहोस्,” उनले दृढताका साथ भने।

त्यसैगरी, प्रहरीका लागि आवश्यक पोशाक उत्पादनसमेत स्वदेशमै गुणस्तरीय रूपमा गर्न उद्योग स्थापना गर्नुपर्ने धारणा उनले राखे। अन्य स्रोतसाधनहरू पनि स्तरीय र दिगो हुनुपर्नेमा जोड दिँदै उनले समग्र प्रणालीलाई आत्मनिर्भर र प्रभावकारी बनाउने दिशामा अघि बढ्नुपर्ने बताए।

गृहमन्त्रीको यो निर्देशनले प्रहरी संगठनभित्र सुधारको नयाँ बहस सुरु गराएको छ भने आगामी दिनमा यसको कार्यान्वयन कसरी हुन्छ भन्ने विषय चासोको केन्द्रमा रहने देखिएको छ।

Facebook Comments Box