सम्पत्ति शुद्धीकरण मुद्दामा दीपक खड्कालाई थप ७ दिन म्याद, ओली–लेखकमाथि सुनुवाइ जारी

काठमाडौं । सम्पत्ति शुद्धीकरण मुद्दामा पक्राउ परेका पूर्वमन्त्री तथा नेपाली कांग्रेसका नेता दीपक खड्कामाथि अनुसन्धानका लागि थप ७ दिनको म्याद दिइएको छ । जिल्ला अदालत काठमाडौंका न्यायाधीश जगत पौडेलको इजलासले आइतबार पुनः म्याद थप गर्ने आदेश दिएको हो ।

सम्पत्ति शुद्धीकरण विभागको सिफारिसका आधारमा प्रहरीले खड्कालाई गत चैत १५ गते पक्राउ गरेको थियो । यसअघि पनि उनीमाथि अनुसन्धानका लागि म्याद थप भइसकेको थियो ।

यसैबीच, पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकविरुद्धको मुद्दामा तेस्रोपटक म्याद थपका लागि अदालतमा सुनुवाइ भइरहेको छ । लेखकलाई काठमाडौं जिल्ला अदालतमा उपस्थित गराइएको छ भने उपचाररत् ओलीलाई भर्चुअल माध्यमबाट इजलासमा उपस्थित गराइएको छ ।

‘जेनजी आन्दोलन’मा दमन गरेको आरोपमा गत शनिबार पक्राउ परेका ओली र लेखकलाई यसअघि ५ र २ दिन गरी ७ दिनको म्याद थप गरी हिरासतमा राखेर अनुसन्धान भइरहेको थियो ।

प्रहरीले उच्चस्तरीय राजनीतिक व्यक्तित्वहरू संलग्न रहेका यी घटनामा थप प्रमाण संकलन तथा अनुसन्धान प्रक्रिया अघि बढाइरहेको जनाएको छ ।

Facebook Comments Box