विशेष महाधिवेशनकै कारण कांग्रेस पराजित : पूर्णबहादुर खड्का

काठमाडौं । नेपाली कांग्रेसका निवर्तमान कार्यवाहक सभापति पूर्णबहादुर खड्काले पछिल्लो आम निर्वाचनमा पार्टीले व्यहोरेको हारको मुख्य कारण विशेष महाधिवेशन भएको बताएका छन् ।

मंगलबार धुम्बाराहीस्थित स्मार्ट होटेलमा आफ्नै समूहका नेताहरूको भेलालाई सम्बोधन गर्दै खड्काले समसामयिक राजनीतिक अवस्थाबारे ब्रिफिङ गर्ने क्रममा यस्तो धारणा सार्वजनिक गरेका हुन् । उनले पार्टीभित्र एकता कायम हुन नसक्दा निर्वाचनमा अपेक्षित सफलता हासिल गर्न नसकिएको उल्लेख गरे ।

खड्काले भने, “यदि नेपाली कांग्रेस एकढिक्का भएर निर्वाचनमा होमिएको भए उल्लेख्य सिट जित्न सक्थ्यो । रास्वपा पहिलो पार्टी बने पनि कांग्रेसले कम्तीमा ७० सिट ल्याउने अवस्था थियो । आज देशले जुन परिस्थिति भोगिरहेको छ, त्यो अवस्था आउँदैनथ्यो ।”

उनका अनुसार पार्टीभित्रको आन्तरिक विभाजनले चुनावी परिणाममा प्रत्यक्ष असर पारेको हो । एकीकृत रूपमा अघि बढ्न सकेको भए कांग्रेस अझ सशक्त रूपमा प्रस्तुत हुन सक्ने उनको दाबी छ ।

खड्काले विशेष महाधिवेशनको अगुवाइ गर्ने नेताहरूलाई वर्तमान अवस्थाका लागि जिम्मेवार ठहर गर्दै पार्टीभित्र आत्मसमीक्षा आवश्यक रहेको पनि बताए । “निर्वाचनमा कांग्रेसले भोगेको दुर्गतिको मुख्य कारण विशेष महाधिवेशनको नेतृत्व गर्नेहरू नै हुन्,” उनले भने ।

उनको यो अभिव्यक्तिलाई कांग्रेसभित्र पछिल्लो समय बढ्दै गएको आन्तरिक बहस र ध्रुवीकरणको संकेतका रूपमा समेत हेरिएको छ ।

Facebook Comments Box