ललितपुरमा चितुवाको आक्रमणमा प्रहरी हवल्दार घाइते, किस्ट अस्पतालमा उपचाररत

काठमाडौं । ललितपुरमा चितुवाको आक्रमणमा परी एक जना प्रहरी हवल्दार घाइते भएका छन्। आज बिहान करिब पौने ९ बजे गस्तीमा रहेको प्रहरी टोलीमाथि चितुवाले अचानक आक्रमण गरेको हो।

आक्रमणमा परी प्रहरी हवल्दार हेम बिक घाइते भएको प्रहरीले जनाएको छ। घाइते बिकको मुख, दुवै हात तथा बायाँ कुममा चोट लागेको छ। उनको हाल किस्ट शिक्षण अस्पतालमा उपचार भइरहेको प्रहरीले जानकारी दिएको छ।

प्रहरीका अनुसार ललितपुर महानगरपालिका–९ का स्थानीयले गहुँबालीमा चितुवा पसेको भन्दै प्रहरीलाई खबर गरेका थिए। सोही सूचनाको आधारमा प्रहरी टोली घटनास्थलतर्फ पुगेको बेला चितुवाले एक्कासी आक्रमण गरेको बताइएको छ।

घाइते हवल्दार बिक प्रहरी प्रभाग लुभु, ललितपुरमा कार्यरत रहेका छन्। घटनापछि स्थानीय क्षेत्रमा त्रास फैलिएको छ भने चितुवाको खोजी तथा नियन्त्रणका लागि प्रहरी र सम्बन्धित निकाय परिचालन गरिएको जनाइएको छ।

घाइते प्रहरी हवल्दार हेम बिकको शीघ्र स्वास्थ्य लाभको कामना गरिएको छ।

Facebook Comments Box