मोदीको निमन्त्रणा स्वीकार गर्दै प्रधानमन्त्री बालेनको भारत भ्रमण तयारी सुरु

काठमाडौं । बालेन्द्र शाह नेतृत्वको सरकारलाई छिमेकी भारतबाट उच्चस्तरीय कूटनीतिक संकेत प्राप्त भएको छ । भारतीय प्रधानमन्त्री नरेन्द्र मोदीले प्रधानमन्त्री शाहलाई भारत भ्रमणका लागि औपचारिक निमन्त्रणा पठाएका छन्, जसलाई शाहले स्वीकार गरेका छन् ।

परराष्ट्रमन्त्री शिशिर खनाल ले निमन्त्रणाको पुष्टि गर्दै उपयुक्त समयमा भ्रमण तय गरिने जानकारी दिए । उनका अनुसार प्रधानमन्त्री शाहले समकक्षी मोदीको निमन्त्रणालाई सकारात्मक रूपमा लिँदै कूटनीतिक च्यानलमार्फत भ्रमणको प्रक्रिया अघि बढाउन निर्देशन दिएका छन् ।

यसैबीच, मौरिससमा आयोजित हिन्द महासागर सम्मेलनका क्रममा खनालले भारतीय विदेशमन्त्री एस जयशंकर सँग उच्चस्तरीय भेटवार्ता गरेका थिए । उक्त भेटमा दुई देशबीच परराष्ट्रमन्त्रीस्तरीय बैठक काठमाडौंमा आयोजना गर्ने र त्यसपछि प्रधानमन्त्रीस्तरीय भ्रमण अघि बढाउने सहमति बनेको छ ।

परराष्ट्रमन्त्री खनालका अनुसार प्रारम्भिक चरणमा परराष्ट्रसचिवस्तरीय वार्ता हुँदै द्विपक्षीय संयन्त्रहरूको पुनरावलोकन गरिनेछ । त्यसपछि सूचना प्रविधि, विकास साझेदारी र प्राथमिकताका परियोजनाहरूको स्पष्ट खाका तयार पारेर उच्चस्तरीय भ्रमण तय गरिनेछ ।

‘हामीले पहिले गृहकार्य पूरा गर्छौँ, त्यसपछि मात्रै उच्चस्तरीय भ्रमणमा जान्छौँ,’ खनालले मौरिससबाट दिएको प्रतिक्रिया उद्धृत गर्दै भने, ‘तयारीसहित हुने भ्रमणलाई सफल बनाउने हाम्रो उद्देश्य हो, र यसमा भारत पनि सकारात्मक छ ।’

सरकारले अब सरोकारवाला मन्त्रालयहरूसँग छलफल गर्दै राष्ट्रिय हितअनुसार परियोजनाहरूको प्राथमिकता निर्धारण गर्ने तयारी गरेको छ । प्रारम्भिक कूटनीतिक संवादपछि हुने यो सम्भावित भ्रमणलाई नेपाल–भारत सम्बन्धलाई नयाँ उचाइमा पुर्‍याउने अवसरका रूपमा हेरिएको छ ।

Facebook Comments Box