भ्रामक सूचना नफैलाउन प्रहरीको आग्रह, ओली–लेखक प्रकरणमा अनुसन्धान जारी

काठमाडौं । जिल्ला प्रहरी परिसर काठमाडौंले दर्ता भएर अनुसन्धानको क्रममा रहेका संवेदनशील घटनाबारे भ्रामक तथा अप्रमाणित सूचना नफैलाउन सबैमा आग्रह गरेको छ।

परिसरका प्रवक्ता प्रहरी उपरीक्षक पवनकुमार भट्टराईका अनुसार ज्यानसम्बन्धी कसुरमा अनुसन्धान भइरहेका र उपर सर्वोच्च अदालतको परमादेश तथा जिल्ला सरकारी वकिल कार्यालय काठमाडौंको निर्देशनअनुसार जमानीमा राखेर विधिसम्मत रूपमा अनुसन्धान अगाडि बढाइएको छ।

प्रहरीले सोमबार जारी गरेको सूचनामा जिम्मेवार निकायसँग समन्वय गर्दै कानुनी प्रक्रिया अनुसार अनुसन्धान भइरहेको स्पष्ट पार्दै यससँग सम्बन्धित अनर्गल, भ्रामक तथा अपुष्ट सामग्री प्रसारण–प्रकाशन नगर्न अनुरोध गरेको छ। यस्ता सामग्रीले जनमानसमा भ्रम फैलाउने र गलत सूचना प्रवाह गर्ने जोखिम रहेको प्रहरीको भनाइ छ।

हालै सार्वजनिक एक भिडियो सामग्रीमा उक्त प्रकरणमा प्रहरीले जानाजान लापरवाही गरेको तथा बयान प्रक्रिया पूरा नगरी आरोपीलाई छोड्ने वातावरण बनाइएको दाबी गरिएको थियो। तर, प्रहरी स्रोतका अनुसार ती दाबीहरू अप्रमाणित र भ्रामक रहेको जनाउँदै सत्यतथ्यमा आधारित सूचना मात्र सार्वजनिक गर्न आग्रह गरिएको छ।

प्रहरीले अनुसन्धान प्रक्रियामा पारदर्शिता र विधिसम्मत कार्यशैलीलाई निरन्तरता दिँदै अफवाहभन्दा तथ्यमा आधारित जानकारीलाई प्राथमिकता दिन सबै सरोकारवालालाई अपिल गरेको छ।

Facebook Comments Box