गृहमन्त्री सुधन गुरुङको राजीनामा : नैतिकताको सन्देशसहित पद त्याग

काठमाडौं । गृहमन्त्री सुधन गुरुङले बुधबार पदबाट राजीनामा दिएका छन्। विवादित व्यापारी दीपक भट्टसँग सेयर लगानीसम्बन्धी विषयमा उठेका जनचासो, प्रश्न र आलोचनालाई सम्बोधन गर्दै उनले नैतिकताको आधारमा पद त्यागेको घोषणा गरेका हुन्।

सामाजिक सञ्जाल फेसबुकमार्फत सार्वजनिक गरिएको वक्तव्यमा गुरुङले आजकै मितिदेखि लागू हुने गरी राजीनामा दिएको जानकारी दिएका छन्। चैत १३ देखि गृह प्रशासनको नेतृत्व सम्हाल्दै आएका उनले सार्वजनिक जीवन स्वच्छ, पारदर्शी र जवाफदेही हुनुपर्नेमा जोड दिएका छन्।

गुरुङले आफ्नो निर्णयलाई “नैतिक जिम्मेवारी” को रूपमा व्याख्या गर्दै पदभन्दा नैतिकता र शक्तिभन्दा जनविश्वास ठूलो हुने बताएका छन्। “देशमा सुशासन र जवाफदेहिताको मागसहित उठिरहेको ‘जेनजी’ आन्दोलनले सार्वजनिक जीवन शुद्ध हुनुपर्ने स्पष्ट सन्देश दिएको छ,” उनले उल्लेख गरेका छन्। साथै, “सरकारमाथि प्रश्न उठ्दा त्यसको उत्तर नैतिकता हुनुपर्छ,” भन्ने धारणा पनि उनले राखेका छन्।

आफूसँग सम्बन्धित विषयमा निष्पक्ष छानबिन होस् र पदमा रहँदा ‘स्वार्थको द्वन्द्व’ देखिन नदिने उद्देश्यले राजीनामा दिएको उनले स्पष्ट पारेका छन्।

राजीनामा घोषणासँगै गुरुङले सञ्चार क्षेत्रतर्फ पनि संकेत गर्दै केही मिडियाकर्मीहरूको ‘स्वीट शेयर’ सम्बन्धी विषयहरू पनि क्रमशः सार्वजनिक हुन सक्ने बताएका छन्। उनले “रामराज्यको चाहना राख्नेहरूले त्याग र नैतिक साहस देखाउनुपर्ने” उल्लेख गरेका छन्।

अन्त्यमा, उनले आम नेपाली विशेषतः युवाहरूलाई सम्बोधन गर्दै साँचो परिवर्तनका लागि सत्य, इमानदारी र आत्मशुद्धिको मार्गमा उभिन आग्रह गरेका छन्।

उनको राजीनामाले वर्तमान राजनीतिक वृत्तमा नैतिकता, पारदर्शिता र सुशासनको बहसलाई थप तीव्र बनाउने अपेक्षा गरिएको छ।

Facebook Comments Box